Tabata dia 21 di mei ultimo cu e conocido periodista y presentado na radio y television, Ruben Trapenberg, a informa riba su pagina di Facebook cu e ta bek na Aruba despues di 4 luna di tratamento na Hulanda y cu e tabata sinti su mes bon. El a logra, danki na intervencion di Dokternan na Aruba y na Hulanda, di contene su enfermedad, cancer, bou control y cu awor lo mester siña biba cune. Lamentablemente awe mainta trempan a drenta e noticia tristo cu el a fayece debi na un ataca di curason.
Tur cos a cuminsa despues di eleccion, na October 2017 ora diripiente el a bira hopi malo. A interne na Hospital, cu na un principio a pensa cu e lo a haya un ataca di curason. A resulta cu no ta esey, a pensa lo ta piedra, pero a scan e curpa y realisa varios test.
Ta for di e testnan ey a saca afor cu e problema tabata hopi mas serio. A diagnostica Ruben Trapenberg cu cancer “lymphoma non-hodgkin”.
https://en.m.wikipedia.org/wiki/Non-Hodgkin_lymphoma
Despues di mas o menos 3 luna di hospitalisacion y intervencion medico di Dr. Jonkhoff y cu yudansa di AZV, a dicidi pa hiba e pashent Hulanda dia 3 di januari 2018 pa sigui tratamento avansa contra cancer lymphoma non-hodgkin.
A drenta Erasmus Medisch Center na Rotterdam mesora y ey a topa cu otro Arubianonan cu tambe ta haciendo e mesun tratamento ey.
Algo mas di un luna pasa e cantante y presentado a informa cu e ta bek na Aruba! “Nos ta bek di Hulanda y tratamento a bay bon. E cancer ta bou control y bida ta sigui. Un Danki di curason pa tur e oracionnan y atencion di boso; mi casa, yiunan, rumannan y famianan cu a yudami. En corto e salud awo ta bon. Danki Dios!”
Diabierna ainda Ruben Trapenberg a traha na Tele Aruba. Ayera dialuna el a yama meld ziek pasobra e no tabata sinti su mes bon.
Condolencia na su señora, yiunan, famia, amigonan y coleganan den e momento dificil aki. Cu Ruben, conoci na radio como “Traxx” y den farandula como “The Tingeling Man” of “Mighty Hippy”…..sosega na paz.
