Dialuna mainta den reunion cu comision fiho di hustica a invita Sindicato di Polis (SPA) riba e topico di overtime den Cuerpo Policial. Aunke e otro topico no a bin dilanti, e Presidente di SPA, Joselito Dirksz, a bisa bon cla cu nan no lo hala niun millimeter for di nan posicion contra legalisacion di marihuana.
Na salida di Parlamentario Robert Candelaria, un ex Altoinspector di Polis, el a bisa di ta contento cu Sindicato di Polis a fiha un posicion cla, basa riba nan trayectoria/experiencia policial y cu ta mira e efectonan cu adiccion na marijuana tin den comunidad, cu despues ta hiba na adiccion na droganan mas pisa. Ta imposibel cu por cambia nan opinion.
Robert Candelaria ta mira cu e opinion cu e sindicato ta basa su mes riba dje ta uno di añas di experiencia y no riba opinion personal. Eherciendo e trabou di Polis ta duna bo un bista amplio riba con e adiccion na marihuana ta keda destrui bida di hende.
Candelaria ta contento cu e topico a haya un sosten extra. No ta di awo cu e ta trece e topico dilanti, pero a nota cu mas y mas instancia tambe ta saliendo cu opinion y informacion na comunidad. Gran mayoria ta contra y ta na su luga pa sali y vocifera den comunidad cu e legalisacion ta algo cu no por tuma luga. Encuentro cu pueblo ta confirma esaki, unda cu topa hende, nan opinion ta keda igual riba e topico aki. Nan ta contra!
Robert Candelaria di su banda sa tambe cu e banda politico na momento di tuma desicion lo ta mara na e acuerdo di gobernacion di e coalicion pa cu legalisacion di cannabis. De facto si no legalise no tin gobierno. Bistiendo e pechi politico e ta reitera locual e la bisa caba, si locual a acorda e tempo aya entre partido nan cu a forma gobierno pa legalisa cannabis medicinal, ta algo hopi simpel cu por por a keda regla hopi tempo caba via Minister di Salud. Den e caso di medicinal, e no ta rekeri tanto cambio drastico di ley pasobra e no lo trese cambia pa cu cultivo mucho menos e parti recreacional cu na Aruba ta prohibi. Caminda bo no mas plante, importe, bende ni tin den bo posecion. Contrario si e ta un medicina lo a keda cla masha tempo caba.
Locual ta mirando awor ta cu despues di dos aña den deliberacion, te ainda no tin accion concreto. Speculando riba empresanan di afo grandi pa gana miyones. Candelaria ta di opinion si kier bin gana miyones di placa riba lomba di pueblo, creando un risico asina grandi, cu un veneno pa bo pueblo djis pa cen y/o pa bisa Hulanda mira nos a cumpli cu bo, ta totalmente robes. Si acaso e cannabis medicinal mes tabata e objetivo principal, nan por e concretisa esaki masha tempo, nan tabatin 2 aña pa haci’e kico nan a warda? Lo a cumpli cu palabracion di gobernacion masha tempo, pero ta mustra cu tin hopi falta di boluntad politico pa finalisa e palabracion haci of nan ta tuma otro haci.
