Diadomingo awo den Cas di Cultura ta bay tin e show di Treasure Island desde 3:30 pm. E show aki ta uno varia, cu baile, acrobaat, circo, teatro y hopi mas. Normalmente Ritmo Cubano Company (RCC) ta haci show na diferente hotel.
Diego Jaramillo di RCC a splica cu nan tin dies aña ta traha cu e compania y diferente show. Pero awo door di e pandemia, nan trabou a baha un tiki. Awo nan tin mas tempo pa haci un presentacion local pa henter e publico di Aruba.
Na aña 2019 nan a haci un gira na China y el a bay hopi bon. Nan a representa Aruba den un festival internacional y despues a haya un invitacion pa habri un ceremonia na Beijing. Despues di e festival ey, nan a haci un gala tour den tres diferente ciudad di China.
RCC ta un compania compania artistico di circo, baile, teatro cu a cuminsa na aña 2010 y ta traha cu diferente hotel. Door di nan trabou, RCC a haya contact cu diferente pais. Apart di China, nan a bay Rusia, Dubai. Nan mester a bay Europa, pero door di pandemia mester a stop tur cos. Na momento cu tur cos cuminsa bek, nan lo cuminsa riba proyectonan.
Por yama of manda un mensahe di WhatsApp na 7444059 pa un reservacion y cumpra ticket. Esunnan cu kier bira miembro di RCC por tuma contacto y ta pasa den un audicion. Aki ta mira e talento di hende y por join nan compania. Nan ta gradici na Freddy Montoya pa su sosten cu nan por haci e evento aki uno posibel hunto cu Departamento di Cultura di Aruba (DCA). Nan a yuda RCC traha hopi riba e show aki. Ta invita pueblo di Aruba pa mira nan show diadomingo awo, 28 di februari, na Cas di Cultura pa 3:30 pm.
