Partido RED Democratico a keda asombra pa scucha hues pasa riba cada acusado den e caso di Avestruz. Cada biaha e hues a duna un motivacion y claramente cada bes e tabata bisa di trata di circunstancia sospechoso. RED Democratico ta puntra su mes si e sentencia di Benny Sevinger ta algo di celebra pa AVP.
Ricardo Croes, lider di RED Democratico, ta bisa den e sentencia, cuater di e casonan hues a dicidi di no castiga e persona envolvi pa motibo di no tin suficiente prueba. Cada bes tabata ripiti circunstancia sospechoso (verdachte omstandigheden), pero no tabatin suficiente prueba pa yega na un conclusion cu defacto esey ta conclui.
Tin Corte den Prome Instancia, unda tur hende sa cu ainda tin Hoger Beroep y posibel casacion. Manera hopi hende sa, den Hoger Beroep y casacion semper e veredictonan por cambia. N’e momentonan aki tin un sentencia y esaki ta un berguensa pa Aruba. Segun Croes, e ta un berguensa cu un ex-minister, un parlamentario n’e momentonan aki ta sentencia na un aña di castigo pa tur locual a hay’e culpabel. Mientras p’e otronan, di cual pa RED Democratico ta e circunstancianan sospechoso, ta haya cu e otronan no por a comete e fechoria a haya mas castigo cu e propio ex-minister. RED ta spera cu den Hoger Beroep e huesnan lo mira cu defacto e trabounan cu Ministerio Publico a haci merece locual e hues a sentencia aki na Aruba.
Na Cas di Partido di AVP tabatin un celebracion comosifuera cu e sentencia di culpabilidad tabata algo pa celebra. Ora un ex-mandatario ta sentencia pa soborno, ta algo di celebra. Y parti di e pueblo di nan sostenedo a bay haci esey cu nan. El a recorda caso di Paul Croes, unda den prome instancia tur hende a para firme. Pasobra supuestamente Ministerio Publico, supuestamente corte, supuestamente Hulanda, yen supuestamente otro hende, pasobra nan no a haci nada. Pero awe, Croes ta sinta su castigo den KIA.
