Tur 27 di maart ta celebra Dia Internacional di Teatro rond mundo. Prome biaha cu a celebr’e tabata na aña 1962. E meta tras di e dia aki ta pa promove arte rond mundo. No solamente pa promove pero tambe pa conscientisa personanan, e balor di arte. Pa e motibo aki, Departamento di Cultura conhuntamente cu Ritmo Cubano ta organisa un evento cultural.
Ta pendiente ainda pa wak con lo bay celebra e dia aki. Tur cos ta depende di e medidanan cu gobierno di Aruba introduci of reintroduci. Sea lo ta un evento virtual of cu di cantidad di persona limita. Lo tin un mensahe universal cu UNESCO a declara. Departamento di Cultura lo percura pa lesa e mensahe aki den Papiamento mes. Tur cas di teatro rond mundo lo lesa e mensahe aki riba 27 di maart proximo. Claro, den mesun idioma. E mensahe aki lo resona den mas cu cincuenta idioma rond mundo.
Un dia despues, esta 28 di maart, Departamento di Cultura ta lansa un proyecto nobo , titula Dreams. Lo ta un siman completo di manifestacion cultural. Ritmo Cubano ta encarga cu e presentacion di e arte. Por spera baile, canto, circo y acrobrat den e presentacion di e grupo. E show mes ta cuminsa for di 6:00 pm. E grupo, Ritmo Cubano, a train basta tempo por presenta un show di calidad p’e pueblo. E artistanan ta emociona y ansioso pa e dia grandi aki.