Un ciudadano preocupa a acerca nos redaccion pa informa cu un persona supuestamente mester a drecha un frishider. Pero a bay cu e placa y e frishider mes no a drecha.
Reynold Ascencion, ciudadano preocupa, a indica cu na Aruba no tin ordo y tur hende ta haci loke nan kier. No tin. El a indica cu diamars el a bay warda di polis pa entrega keho. Diadomingo el a haya problema cu frishider y Unicon no ta traha, y den corant el a haya un number cu el a yama.
E persona masculino, kende yama Avelino, a presenta pa drecha e frishider. E persona a bisa Ascencion cu e problema ta un timer y el a bay busca uno. Por a mira e piesa cu e homber a bin cu ne ta saca di un frishider bieu y a pon’e den esun di dje. El a informa e homber cu e frishider no ta fria, pero a bis’e pa dun’e tempo pa fria cual el a haci. Dialuna e ta yama e persona, di cual un hende muhe a bis’e cu e homber lo pasa mas laat. Pero e no a yega, mientras tur cos den su frishider a daña.
Ascencion a yam’e diamars mainta pa bis’e cu e timer no ta traha. E homber a bin cu diferente excuus di ta na hospital. Esey a pone cu Ascencion a dicidi di bay warda di polis, unda e homber a bisa cuent’i ta su yiu. E ta haya cu e persona aki ta sin escrupulo. Segun Ascencion, e persona wel di keda cu e placa, pasobra e 350 no ta hacie “ningun donder.”
E kier pa hende haya sa kico ta pasando na Aruba. Esaki no ta prome bes cu algo asina ta pasa. El a sigui conta cu no ta prome biaha e ta pasa den algo asina. E ta corda c’un homber a acerc’e cu algun pushi pa no mata nan. El a inverti mas di seis mil den nan, na material y tur trabou mal haci, nan ta bin duna recibo. El a cuminsa cansa di e tipo di cosnan asina.
“Ken cu tuma bo haci, pasobra den e luga aki bo no tin ley, parce cu e malhechornan ta haci y deshaci”, el a expresa. Segun Ascencion, loke ta bay pasa n’e luga aki ta cu ta bay yega un momento cu tur hende ta bay tuma ley den nan man. E kiermen cu ningun hende no ta bay tum’e haci mas. El a indica cu e personanan por keda cu e placa. E kier pa tur hende na Aruba paga tino y no tuma co’i kens mas, pero reporta nan.
