Na Hulandes nan ta bisa “driemaal is scheepsrecht”. Ora bo a faya dos biaha caba, hopi biaha di tres biaha si lo bo logra.
Esaki por lo menos ta e speransa di Team Biba Lekker kende ya a perde dos biaha caba cu Team Balashi Knights. Wel amantenan di bon domino, diasabra 3 di november cuminsando pa 8’or di anochi, 99 Bar & Restaurant, mihor conosi como e unico Domino Square Garden na mundo, lo ta scenario di otro revancha grandi ora Biba Lekker pa di tres biaha purba su suerte cu Balashi Knights!
Manera tur amante di domino sa, e conosido team Balashi Knights ta un di e weso duro nan cu tin den bush league! Biba Lekker pa dos biaha caba a kibra nan djente ariba e weso duro aki, y awor ta bay hasi di tres intento pa “kraak” e weso aki y saca su “tutu”! Pa e tantisimo fanticada cu lo sinta den tribuna y gosa di e spectaculo aki lo ta bay tin e conosido snacks nan di Han y promocionnan di happy hour! Shonnan esaki no ta cos di perde! Diasabra awor, 3 di november, cuminsando pa 8’or di anochi, 99 Bar & Restaurant lo ta e “Square Garden” caminda e campeonnan Balashi Knights lo enfrenta Biba Lekker! “Driemaal is scheepsrecht”?? Yegaaaa y haya sa si ta berdad!
