Diahuebs mainta Minister Presidente mr. Evelyn Wever-Croes a ricibi un delegacion grandi den sala di Conseho di Minister, pa un reunion urgente relaciona cu e situacion di holo peligroso saliendo for di WEB y cu ta stroba operacion riba tereno di waf di carga na Barcadera.
Na mesa tabata sinta representantenan di Gobierno, di WEB, di ASTEC, di Aruba Ports Authority, di Directie Natuur en Milieu y di e organisacion ATIA. E rol di APA ta crucial, siendo nan doño di e waf di carga, pero cu tin un contract di operacion cu ASTEC. A nota tambe presencia di ex Minister Ing. Edison Briesen, den su calidad di Consehero di Gabinete Wever-Croes.
For di algun aña caba e problema aki ta andando y a purba di varios manera pa yega na un solucion, pero toch sin resultado. Trahadonan di ASTEC constantemente ta keha di e holo fuerte y tin di nan a hasta bira malo. Dokternan ta sigura cu ta e holo fuerte ey tin consecuencia pa salud di e empleadonan.
Awe durante e reunion cu tur partner na mesa, a bin padilanti cu e huma saliendo for di pipanan na WEB lo ta contene emision di cierto gas nan cu por causa molester na e trahadonan di ASTEC riba waf.
Prome Minister Evelyn Wever a sigura cu pe bida di hende no ta algo di haci wega, pues e kier tende di un solucion urgente y sin ningun tardamento mas. WEB a bay di acuerdo cu lo bay intensiva nan plannan existente caba pa yega na un solucion pa e holo di gas cu ta sali.
Un ke otro tin di haber cu e proceso cu nan ta aplica internamente den WEB, uzando heavy fuel oil. Ta pensa cu ora cambia pa uza gas como formula pa maneha e planta, cu e problema ey lo ta tras di lomba. Pero e proyecto pa cambia di heavy fuel oil pa gas ta tuma algun aña. Tin otro formanan tambe con pa evita cu gas ta sali asina sin mas den aire, den cual ta causa efecto riba otronan den vecindario.
Gobierno a instrui WEB cu nan mester bin cu un solucion pronto.
