Den fin di siman e ekipo di domino di Bubali a celebra fin di aña 2018 cu un cena di Pasco y combina cu bautismo di uniform nobo pa e team. Semanalmente e ekipo ta train na nan sede pa por participa den campeonatonan di domino. “Nos ta hunga varios wega. Nos ta gana un par y nos ta perde un par. Semper mester tin un perdedo, Bo no por pensa cu semper Bo ta gana tampoco. Pero nos tin plannan grandi pa e aña venidero”, asina Jack Tromp, kende ta encabesa e ekipo di domino di Bubali, a enfatisa.
Na luna di januari caba nan lo start cu diferente actividad cu otro teamnan di domino,participando den “Bush League”. Meta ta pa invita teamnan di afo, manera for di Corsou y Sint Maarten pa bin competi den e torneo na Aruba. Di mes manera kier organisa un torneo na cas pa scoge 4 team di Aruba pa bay hunga tambe na Corsou y Sint Maarten e aña venidero.
Domino ta un wega cu ta forma parti di nos cultura. Na Aruba ta cuminsa hunga domino desde mucha y ta hung’e unda cu ta, bou palo, na cas, na trabou, den tur bon fiesta y mas. Jack Tromp ta kere cu no mester mucho les pa siña hunga domino, pero si pa perfeccion’e. E ta un wega di strategia den cual Bo ta move cada piedra pensando locual Bo contrincante lo hunga na e otro banda, cu e meta pa caba cu tur bo piedranan prome y asina gana e wega.
“Domino no tin edad, ni rasa, ni religion. Por ehempel, tin un meneer di 94 aña hungando cu nos. Mas cu djis domino, e ta un forma pa e distrai, pa e tene su mente skerpi, pa e topa amigonan, pa e diberti y pa e por sali for di cas pa pasa ratonan agradabel”, asina Tromp a finalisa bisando.
