Esaki ta e siman cu scolnan secundario rond Aruba ta haya resultado di examennan. Tin caranan di alegria, tristesa pero tambe di speranza cerca esnan cu lo tin chens cu HER-Examen pa finalmente gradua ainda.
MAVO merdia y anochi a entrega nan resultado diaranson anochi y docentenan ta contento cu e logro di e studiantenan. Robin-Ann Didder, adjunct director middag MAVO San Nicolas a bisa cu e resultadonan di e aña’ki ta miho cu añanan anterior. Studiantenan di Middag MAVO, e docente a splica, ta muchanan cu ta haci uzo di un di dos oportunidad cu nan tin pa toch logra haya nan diploma.
Y mester bisa cu no obstante nan situacion financiero y social, ya cu nan ta hobennan cu ta tata, mama of ta traha tambe y bay scol, y a lucha fuerte pa logra finalisa nan scol. P’esey e cifra por mustra tiki pero e ta un logro grandi ora cu un hoben cu tur e retonan aki toch ta logra slaag. Nan tabatin 247 studiante entre Middag y Avond Mavo, di cual 50 a slaag den e prome tanda y tin un otro 40 mas cu ta bay pasa Her Examen cu tambe tin bon chens pa slaag. Nan ta contento cu esaki pasobra traha y bay scol ta algo hopi dificil. 
Un di e vaknan mas dificil ta wiskunde, pero e resultadonan ta di tal indole cu den her examen tin varios studianmte cu por slaag pa motibo cu loke nan falta, mescos cu den Geschiedenis, ta apenas 1/10 punt. Diaranson mes e studiantenan a haya informacion den cual vak nan tin chens pa haci HER Examen. Ta nan derecho si nan kier scoge algo otro, pero e scol semper ta duna guia y mustra nan unda ta e miho posibilidadnan pa nan por slaag ainda.E tabata tin palabra di elogio tambe pa docente di Wiskunde kende lo sacrifica su diadomingo pa train tanto e muchanan di Playa como pariba pa toch nan tin chens pa slaag ainda, subiendo nan punto pa e materia aki. “Docentenan sa cu nos mester di nan apoyo y ta duna algo extra di nan banda pa mas tanto mucha por slaag.” E persona cu a logra resulta a slaag cu 50 punto.
Semper scol ta boga pa tin e miho resultado, pero no mester lubida cu e ta un combinacion di no solamente alumno y docente pero tambe di e mayornan na cas pa guia e studiantenan pa nan por logra.Natalie Geerman, directora di AVOND MAVO tambe ta satisfecho ya cu e tabata un aña di hopi reto, unda cu e scol a bay cay bou di otro directiva y cu a trece varios cambio. P’esey ta hopi contento cu logro di e alumnonan. AVOND MAVO ta un scol hopi special, pasobra e studiantenan ta enfrenta basta reto den nan estudio cu nan ta sigui den oranan di anochi. “P’esey cada alumno cu slaag ta un victoria pa nos.”E porcentahe ta importante, pero mas importante ta e esfuerso cu a wordo haci pa logra. en AVOND MAVO tabatin 9 examen-klas.
