Dr. Hendrikus van Gaalen, Director di Fundacion Respaldo ta bisa cu t’asina cu no tin salud sin salud mental. Si bo tin un problema cu bo salud fisico pero bo tin un bon salud mental, bo por wanta.
Sin embargo si bo no tin un bon salud mental, bo no ta logr’e. “Berdad e ta bin na tur nivel, tur edad, nos sa con nos ta dividi e trabao entre instancia – y locual mi a wak di e bunita video di FADA ta e mensahe cu e ta okay pa bo no ta okay.”
Dr. Van Gaalen ta duna un ehempel cu hopi di su amigonan a haya terapia, su rumannan, su mama y su propio alumnonan cu ta haya terapia pa hopi tempo. E ta okay pa no ta okay segun dr. Van Gaalen y si bo no ta papia riba dje y stigmatisa otro, e no ta bay na bon lugar.
Si bo ta discrimina otro, e ta hala atras, haya miedo y no kier bay tuma terapia. Esaki ta causa cu e problemanan ta bira mas grandi.
Si bo ta mira pandemia di antes, cu tur su problemanan fisico por ehempel riba Covid19 mes, cu tur su efectonan di hendenan cu a fayece of trauma cu bo ta haya despues di bay hospital.
Pero despues di esaki bo ta topa cu mas pobresa, mas problema den comunidad cu ta bin riba esaki. “Anto no lubida cu e problemanan social ta causa importante pa haya malesa y problemanan mental grandi.”
