Aquanette Gunn (MAS): “Gobierno mester trece claridad y transparencia riba varios aspecto di Arubahuis

E falta di claridad y transparencia den varios aspecto di Arubahuis a yega na un punto critico. Diabierna miembro di Parlamento, Aquannette A. Gunn, a dirigi un serie di preguntanan penetrante na Minister di Asunto General, Innovacion, Organisacion Gubernamental, Infrastructura y Planificacion Teritorial, mr. Evelyna C. Wever-Croes, tocante e nombramento temporal di e directora interino, e reorganisacion di Arubahuis, e maneho di e edificio y su renobacion, y e proceso di seleccion y nombramento di e director nobo.

Nombramento temporal di directora interino

Dia prome di juni 2022, Glenda Hernandez a keda nombra como directora interino di Arubahuis pa un termino di 3 luna. E nombramento di Hernandez a causa un sentimento mixto bou di e comunidad di Aruba y mas ainda e forma con su nombramento a keda anuncia.

Segun e ex Minister Plenipotenciario, Guilfred Besaril e tabata sumamente contento cu nombramento di Hernandez, pues el a declara cu Hernandez lo reenforsa e organisacion y tambe su persona lo yuda den e transicion di Arubahuis. Tambe e ex mandatario a duna di conoce cu Arubahuis lo muda temporalmente den otro edificio, pa asina renoba e edificio situa na R.J. Schimmelpennincklaan.

Ironia di bida ta cu nuebe dia despues, esta 10 di juni 2022, Besaril a declara cu el a entrega su retiro como Minister Plenipotenciario. N’e momento ey e motibonan cu el a duna pa tuma tal decision, tabata simplemente un burla (falta di integridad y transparencia) pa cu e Pueblo Arubano. Na final di cuenta a sali na cla cu e motibonan pakico e mester a retira ta debi na malversacion y fraude cu placa di pagadonan di impuesto di Aruba. 

Gobierno di Aruba (lesa: Prome Mandatario di Aruba, mr. Evelyna Wever Croes) a indica cu Hernandez lo structura e organisacion Arubahuis, cual e tin tres luna di tempo pa haci tal y cu simultaneamente den e tres luna ey lo inicia cu e ‘werving en selectie procedure’ di un director nobo pa Arubahuis. Un anuncio pa e funcion di director a keda publica y e ultimo dia pa por a reacciona tabata 30 di juni 2022. Mientrastanto e nombramento temporal di tres luna a prolonga te dia di awe. Pues Hernandez tin mas cu un aña y cuatro luna den dicho funcion.

Reorganisacion di Arubahuis

Minister President di Aruba a indica cu un di e tareanan mas cardinal di e directora interino, Hernandez ta cu su persona lo encarga pa structura e organisacion di Arubahuis.

E Prome Mandatario a enfatisa cu e tempo cu e directora interino tin pa haci tal ta tres luna. Mientrastanto 16 luna a transcuri y e Parlamentario ta di opinion cu ta na luga y ta su deber pa dirigi preguntanan relaciona cu e aspecto di e reorganisacion di Arubahuis pa asina haya claridad.

Renobacion di e edificio di Arubahuis

Prome cu e pandemia di Covid-19 tabatin plannan pa renoba e edificio di Arubahuis situa na R.J. Schimmelpennincklaan, pero debi cu Pais Aruba no tabata dispone di e espacio financiero a dicidi di pone e plan di renobacion ‘onhold’, pero na final di e di dos kwartaal di 2022 Arubahuis a muda den un localidad temporal.

Durante e bishita di e Prome Minister na Arubahuis na juli 2022, su persona a indica cu e procedura pa loke ta trata e edificio di Arubahuis ta bay start. Ademas el a declara cu e siguiente paso ta pa bin cu un ‘bouw technisch onderzoek’pa determina kico lo mester pasa cu e edificio.  Entretanto mas di un aña a pasa y nos fraccion kier tin claridad den e aspecto aki.

Nombramento di un director nobo

Inicialmente e procedura pa haya un director nobo pa Arubahuis mester a cana paralelo cu e tres luna di nombramento di Hernandez. Den e anuncio pa e funcion di director cu a keda publica, e ultimo dia pa por a reacciona tabata 30 di juni 2022. Nos ta diescinco luna despues y te na e momento aki no a nombra un director nobo. 

Parlamentario Gunn ta subraya cu fraccion di MAS ta haci un apelacion pa haya contestanan concreto y detaya, y pa un maneho transparente y etico den tur asunto gubernamental. Nos fraccion ta para cla pa defende e derecho di e Pueblo pa sa y pa ser informa na manera adecua.