Dia 10 di February a sosode un supuesto accidente riba e caminda banda di Boca Catalina. E dia ey a drenta informacion den oranan di atardi cu auto a dal un ciclista. Na prome instante no a papia directamente di hende herida. Ora cu Polis a yega a topa un ciclista benta riba caminda cu herida. Polisnan a haci investigacion na e sitio y hasta Departamento di Trafico a presenta.
Un auto Kia Sportage color blanco ta e auto cu a dal e ciclista. Mientras cu tur hende a kere cu ta un accidente e tabata, e cos a draai full un buelta nobo. Declaracion di e victima y tambe di testigonan a haci Remie Banwari un sospechoso. Loke supuestamente tabata un accidente na prome instante a bira algo intencional. E victima ta un Hulandes biba na Aruba.
El a declara cu e tabata tin un discussion un rato prome cu e chauffeur Remie Banwari cu tabata cu e Kia Sportage color blanco. E discusion aki a surgi ora el a reverse e auto net ora e ciclista tabata acercando y hera causa accidente. Despues di e tiramento di palabra, Remie Banwari a cuminsa core tras di e ciclista. E tabata bay su tras y haci expresionnan menazante. Na dado momento el a yega asina leu cu el a bay dal e ciclista intencionalmente y lage herida. E dia ey 10 di February e testigonan hasta a bisa cu Remie Banwari kier a bandona e sitio di accidente pero a para basta leu y bin bek cu pia na e sitio.
Mirando e declaracion di e victima y tambe e testigonan, fiscal a duna ordo pa bay over na duna ordo pa detencion. E victima a haci un denuncia y testigonan a haci e denuncia di e victima mas fuerte. Recherche a bay over na detencion despues di mas cu un siman mas of menos cu e caso a sosode. E ta sera na warda di Noord y a ser interoga y hasta a presenta dilanti di fiscal y huez comisario. E acusacionnan ta serio pasobra ta acuse di Intento di Asesinato y tambe Maltrato Serio y Pisa unda un hende a keda Herida. Remie Banwari ta traha den un compania masha conoci cu ta lease auto entre otro na teamnan special di Cuerpo Policial.
