Den un reunion di Conseho di Minister extraordinario, sin presencia di Minister Lopez-Tromp y sin presencia di Minister Rudy Lampe (RED), a dicidi pa kita cartera di e Ministerio di Infrastructura. Esaki debi cu den Parlamento a nota awe henter dia cu no tin sosten di 11 asiento pa baha e mandatario. A purba pasa un decision cu no tin sosten di ley, mientras di otro banda a invita e mandatario pa un reunion pa intermediacion diasabra mainta.
Ministerraad a dicidi pa practicamente kita e cartera di Infrastructura y Medio Ambiente for di Marisol Lopez. Por lo pronto responsibilidad di e cartera ministerial concerniente lo ta bou di Minister President.
“E decision no tabata uno facil, pero tin diferencianan ireconciliabel entre Minister Marisol Lopez-Tromp y varios Minister den coalicion y den interes pa por tin stabilidad y gobernacion efectivo di nos pais pasonan decisivo mester a wordo tuma mirando e crisis sin precedente mundial cu nos pais ta enfrentando”, asina Gobierno a manda informa den un relato di prensa un rato pasa. Esaki ta bin debi cu tin investigacion penal tumando luga den cual ex-Minister Otmar Oduber ta envolvi y no por descarta cu tin mas Minister cu posiblemente por tin di haci den e investigacion.
A invita Minister Marisol Lopez pa mañan 11:30am topa cu un comision special cu ta consisti di miembronan di tur tres partido di coalicion encabesa pa abogado mr. Arie Swaen. Su rol ta pa mira si tin espacio pa drecha e relacion interno. Straño si, pa e intento aki, despues cu ya a kita e cartera caba.
Minister Marisol Lopez lo sali diadomingo awo pa Hulanda cu su yiu muhe grandi pa sigui studia. Tin indicacion cu lo tin reunionnan pisa andando mañan ainda, posiblemente cu Gobernador y hasta VNO, como cu Hulanda ta siguiendo e desaroyonan politico masha di cerca.
