Investigacion pa corupcion cu tereno: A suspende Ronny Maduro for di DIP

22926

No ta algo cu a cuminsa for di awor, pasobra ta den tempo di carnaval caba aña pasa tabatin corupcion cu kavel den cual un persona prominente yega na Minister tabata envolvi. A tapa e investigacion e tempo ey. Pero ta parce cu cambio di Minister a nifica cambio di mentalidad y awo si e macuto a bolter y puitonan a cuminsa sali den e departamento di infrastructura y planificacion (DIP). A cuminsa investiga algun cara conoci, entre otro di e politico Ronny Maduro.

Asina cu Marisol Lopez-Tromp a tuma e funcion over a cuminsa investiga con tur cos ta hinca den otro. No a dura mucho pa el a descubri cu Michael Carty tin mas beneficio riba su salario cu e director di DIP mes. Ora a yega fin di luna, a resulta cu ex-Minister Otmar Oduber a pone den DIP sin tin un contract, sin tin vacatura habri y mas cu tur cos, sin cu tin presupuesto aloca pe. Consecuentemente a baha su salario prome y despues a kit’e pasobra e no por a demostra un contract tampoco. Fuera di esey ta investigando con e por ta traha na DIP y a regla un kiosco pe na Carnival Village, aunke el a bisa ta pa un famia di dje, pero tur cos na final ta riba su mesun nomber.

Ta bin acerca cu algun siman pasa a start un investigacion pa tereno huurgrond. Yen di hende ta yama Gobierno pa bisa cu nan a yena tur nan documentonan pa renoba nan contract cu Gobierno pero toch ta sigui bisa cu falta documento. A dicidi di haci un “test” y deliberadamente a laga un hende entrega su documentonan y mira kico ta pasa. Dicho hecho! A bis’e cu e falta documento y cu pa mas lihe, miho e bay na e oficina di consultant di ex-Minister Otmar Oduber pa e yud’e y asina keda cla mas lihe. “Djaca den trampa!”, asina a gara e coruptonan den DIP y mesora a sali ordo pa suspende nan for di nan funcion y a start un investigacion disciplinario interno banda di un investigacion penal na Landsrecherche pa corupcion cu tereno di huurgrond.

Pero esey no ta tur, pasobra ex-Minister Otmar Oduber a hinca henter e maneho di tereno comercial den man di e politico Ronny Maduro. E tabata conoci como presentado di noticia na ATV hopi aña pasa y tabatin su mesun negoshi di bende piesa di auto. Ora POR a sinta, a hacie e coordinador di Minister den DIP cu ta atende cu terenonan comercial. Politicamente e no a logra mucho, e tabata candidato # 16 riba lista di POR y no a logra convence mas cu 53 votado pa dun’e nan confiansa.

Ronny Maduro tabata e nomber cu ta zona tur caminda ora ta busca tereno of si e proceso pega den DIP. Ta sospecha awor cu deliberadamente un grupo yega na ex-Minister Otmar Oduber tabata percura pa e terenonan “pega” pa asina por logra los nan di otro forma. Esey Landsrecherche ta investigando awor, separa for di e caso cu ya caba Otmar Oduber ta sospechoso den dje. Ta parce cu den DIP tabatin hende cu ta mes of mas sabi cu ne y a lanta nan mesun “negoshi clandestino” di tereno y awor ta haya nan mes confronta cu investigacionnan pisa cu lo por tin consecuencia pa nan pronto.

Hunto pa un solo meta…riba e foto lider di POR, Otmar Oduber hunto cu Alan Howell y Ronny Maduro den pleno campaña politico di POR dos aña pasa. E hecho cu a logra forma coalicion cu MEP a haci cu Maduro mesora a bira e homber poderoso den DIP pa otorgamento di tereno comercial y awe e ta bou investigacion interno den e departamento y a prohibi su entrada den DIP por lo pronto.

A nota cu riba rednan social, asina cu a cuminsa investiga y suspende algun figura prominente, cu de facto, suspendiendo nan ta kibra e poder di ex-Minister Oduber den DIP, cu mesora a cuminsa presiona pa bula cabes di e Minister afo. Claro cu Gobernador ta siguiendo henter e proceso aki di cerca den nomber di Gobierno di Hulanda, hunto cu Procurador General, pa tuma nota con deliberadamente, den un forma di “cartel” ta purba destabilisa Gobierno y baha un Minister debi na un investigacion penal pa evita corupcion cu tereno di pueblo. Por spera desaroyonan interesante e fin di siman aki ainda, den e proceso pa cuida terenonan di pueblo.