Dialuna atardi a tuma luga un ceremonia den Santana di Santa Cruz, pa conmemora e di 32 aña di fayecimento di e lider inmortal di e pueblo Arubano, Betico Croes. Tradicionalmente ta recorda Betico Croes riba su fecha natal, dia 25 di januari y riba e fecha di su fayecimiento, esta 26 di november. Betico Croes a accidente dia 31 di december 1985 y a keda den coma te dia el a fayece na november 1986.
Na e ocasion aki y despues cu tur presente a canta himno di Aruba, a haci e tradicional ofrendanan floral dor di Xiomara Ruiz-Maduro y Presidente di Parlamento, Ady Thijsen na nomber di e partido cu Betico Croes a funda, esta MEP, mientras cu Maikito Croes y Hendrik Croes na nomber di Fundacion Betico Croes y finalmente door di Glenbert Croes y e hobencita Franchesca Saladin na nomber di yiunan y famia di Betico Croes.
A sigui despues cu discursonan di Xiomara Ruiz-Maduro, Maikito Croes y Hendrik Croes, kendenan a elabora riba e bida y lucha di Libertador Betico Croes, kico e gran luchado aki a nifica pa pais Aruba y pa awe nos ta un pais autonomo den Reino Hulandes.
Finalmente a sigui un Santo Sacrificio di misa unda a resa pa descanso di alma di e gran estadista aki.
