Ya pa algun luna kaba tin hopi diskushon tokante di drone nan ku ta baha den prizòn. Nos por a tuma nota ku trahadónan di prizòn a reuní riba e tópiko aki.
Minister di hustisia tambe a mustra su preokupashon nan pa ku esaki. Parlamento di Kòrsou tambe a hasi preguntanan na e minister di hustisia durante un reunion públiko di parlamento di Kòrsou. Frakshon di PIN ta mira un solushon fásil pa kaba ku e asuntu di drone nan ku ta baha den prizòn.
Ta masha fásil pa kaba ku esaki. E minister di hustisia mester aserka e minister di tráfiko, transporte i planifikashon urbano i puntr’e kon e outoridatnan di aviashon a sera e area rondó di aeropuerto di forma ku drone no por bula den e area di aeropuerto. Den e area di aeropuerto un drone no por bula. Ta yega un kaminda ku e drone mes ta bula bai bek for di e area. Si dado kaso e drone insistí pa drenta e area, e drone ta pèrdè tur señal i lo dal abou ku tur e konsekuensianan pa e doño.
Pues muchu diskushon inesesariamente. Ta parse ku na Kòrsou nos gusta diskutí i pèrdè tempu riba kada punto ku presentá, siendo e solushon tei masha dia. Ta kuestion di tuma desishon i sòru ehekut’é.
