Esaki ta e berdad cu grandi y chikito mester sa den e amor di Cristo Hesus pa asina yega na arepentimento. E asunto di matrimonio di mesun sexo ta un rebeldia contra di Dios, mescos cu e relacion sexual di un pareha di mesun sexo ta un abominacion dilanti di Dios.
Laga nos papia e cos cla manera e ta, pasobra dia pa dia rond mundo ta parce manera e cos aki ta bira un guera carnal, wega politico, negoshi. Tin hende cu sa y tin hende cu no sa cu ta contra Dios nan ta bringa. Ora bo ta stima bo prohimo, bo mester bis’e e berdad.
E unico relacion sexual aproba pa Dios ta esun entre homber y muhe, tanto pa ser humano como pa animal. E unico matrimonio aproba pa Dios, ta esun entre homber y muhe.
Ni maske ken aki na mundo por cambia ley y apoya e matrimonio di mesun sexo, sea ta United Nations, e paisnan di G20, Union Europeo, of sentencia di un hues , nan no por cambia e decision di Dios den cielo. Sea e ta wordo apoya pa politica of pa amistad, toch den cielo e ta wordo rechasa, pasobra e ta sembra den rebeldia contra Dios.
Pasobra maske con bo boltro pica, ta pica e ta keda, por ehempel si un polis gara bo ta stuur bao di influencia di alcohol, no ta importa si bo a dal dos so of bo a guli un longneck di whisky, ta locual e aparato di supla indica, a base di esey bo ta wordo deteni.
Ta basta haci wega cu pica y rebeldia. Tur esunnan rond mundo cu awe ta priminti di duna un man cu conseho y aprobacion, nan tambe ta wordo conta como rebelde dilanti di Dios.
Isaias 63:10 ta para skirbi: Ma nan a rebeldia y haci Su Spirito Santo Tristo, p’esey pa nan El a cambia y bira nan enemigo. El a bringa cu nan.
Salmo 68:6 ta para skirbi:Dios ta provee un cas pa e solitario. E ta saca e presonan guia nan na prosperidad, ma e rebeldenan ta biba na un tera seco, seco.
1 Samuel 12:15 ta para skirbi: Si boso no kier scucha e bos di Señor, ma ta rebeldia contra e ordo di Señor, e ora ey e man di Señor lo ta contra boso, mescos cu e tabata contra boso tatanan.
Ora hende ta den rebeldia contra Dios e Spirito di Dios ta aparta for di nan, ehempel di esaki tur hende sa kico a pasa cu rey Saul ora e spirito di Dios a bandon’e. P’esey David a pidi Señor pa nunca kita su Spirito for di riba dje.
Y e gran berdad ta cu aunke cuanto Igualdad wordo lucha pe, ningun Igualdad no por reemplasa e presencia di e Spirito di Dios, e matrimonio di mesun sexo no ta un union estableci pa Dios, sino pa hende cu ta rebeldia contra Dios.
Pasobra ta e Spirito Santo ta uni matrimonio entre homber y muhe.
P’esey tur esunnan cu conoce Dios ta den oracion, pa tur esunnan cu ta den rebeldia contra Dios, y tambe pa esunnan cu ta apoya nan, pasobra nan tambe ta causante di e furia di Dios riba bida di esunnan cu ta rebeldia (Isaias 5:20).
Dios ta pordona tur hende cu arepenti y aparta for di pica, y esey ta nos deseo pa tur esunnan cu ta den rebeldia contra Dios, arepenti y scoge pa e bendicion di Dios.
