Catherine Midi ta coordinador di actividad di FAVI y ta conta tocante e proyecto cu e fundacion ta organisando di “Un cop’i te” cu a inicia relaciona cu “Oranjefonds”, pa asina por haya comunidad mas cerca di FAVI. Tambe na mes momento por facilita mas informacion pa e clientenan di e fundacion cu tin limitacion di bista.
E proyecto ta dirigi principalmente na tur persona den comunidad pa menciona entre otro: famia, amistadnan di e clientenan di FAVI, personanan cu tin limitacion di bista, trahadonan den sector di salubridad, polis, personal di ambulance, e nurse-, maestronan, miembro- di prensa, gruponan boluntario, tur cu ta desea di haya informacion por bin FAVI y haya “Un cop’i te” cu FAVI.
Adicionalmente e proyecto di “Un cop’i te” por yuda prensa den diferente forma. Aki a pone enfasis den e forma con e miembronan di prensa ta reporta, lo por haci esaki di forma mas accesibel pa esunnan cu tin un limitacion visual tambe por tin un miho percepcion di noticia y e desaroyonan.
Sari Wernet-Kelly ta un terapista di revalidacion na e fundacion y a duna un demostracion cu camarografo Benny di 24ora, pa medio di tapa su wowo cu un paña y a pone dos zonido pa e camarografo por a scucha, uno for di un reportahe di noticia local y uno di un zonido di lama.
E zonido di lama tawata dominando mas den e oido di e camarografo cu e reportahe y aki ta un aspecto pa atende cu lo por adapta e forma di presenta noticia, cu lo por facilita esunnan visualmente incapacita pa por tin un miho percepcion di noticia for di un angulo auditivo, tanto via television of pa medio di un website of rednan social. Aki prensa ta hunga un rol importante pa yuda un persona cu limitacion visual sali for di isolacion social.
Wernet-Kelly a mustra cu Fundacion FAVI su portanan semper ta habri pa tur persona cu mester mas informacion con pa yuda un ser keri cu tin problema visual. Tambe e funcionario ta subraya e importancia si un persona cu tin problema cu su bista semper por acudi na e fundacion pa yudansa. FAVI tin personal y ekipo specialisa cu por yuda pa haci test y duna recomendacion na un persona cu problema di bista.
Oranjefonds ta un proyecto di Hulanda, tin diferente pais y nan respectivo fundacion ta participa na e proyecto aki. Tema pa e aña aki ta: Isolacion. E personanan cu ta perde nan bista hopi biaha ta cay den isolacion social y no ta participa den e eventonan social cu tin den comunidad. FAVI ta desea pa yuda na saca e personanan aki for di isolacion cu e proyecto “Un cop’i te” y por ofrece n’e personanan cu limitacion visual e oportunidad pa por participa.
Lo tin un votamento special pa e proyecto aki “Un cop’i te”, cu lo cuminsa for di 23 pa 30 di mei 2024, pues lo tin solamente 1 siman pa vota. Riba 3 di juni venidero lo haya sa cua di e fundacionnan cu ta participa na Oranjefonds lo pasa pa e siguiente ronda.
Con pa vota? Na e Facebook page di Fundacion Arubano di esnan Visualmente Incapacita lo haya e “post” cu e QR code pa vota. Por uza e QR code pa por vota, asina yuda FAVI pa por pasa pa e siguiente ronda di Oranjefonds. Pa mas informacion por bishita e fundacion su oficina na Primavera 233 of por tuma contacto via telefon: 582-5222.
