Diasabra awo, dia 2 di december 2023, ta tuma luga e vuelo inaugural for di Lima, Peru pa Aruba. E vuelo di e aerolinea LATAM, di mas o menos cuater ora, ta sali merdia y ta yega atardi nos isla riba diahuebs, diasabra y diadomingo. Tarifa di introduccion ta cuminsa for di apenas $185 roundtrip. E siman aki autoridad di turismo y di aeropuerto ta na Chile y Peru pa promove nos isla mas y purba atrae mas tanto pasahero posibel.
Aruba Tourism Authority (ATA) ta haci esfuerso continuo den e mercado di Chile y Peru. E entidad di turismo ta haciendo hopi esfuerso pa atrae e turistanan pa bishita Aruba. No di awo, sino pa mas di dies aña a explora e mercado, a negocia, te cu awo a logra cera un acuerdo cu un bon partner, esta e aerolinea Latam.
Sanju Luidens-Daryanani, Chief Marketing Officer di ATA, a duna di conoce cu pa hopi aña caba Aruba tin un bon presencia den Latino America. Peru y Chile ta dos di e mercadonan di mas nobo aunke cu pa hopi aña Aruba ta activo den ambos mercado. Na aña 2012 Aruba Tourism Authority a contrata un representante na Chile y nan ta representa ATA na Peru tambe. Bisando esaki, Aruba ta trahando mas di dies aña caba riba e destino.
Interes ta sigui crece
Pa loke ta e mercado di Chile y Peru, awo por mira cu e vuelonan cu ta bay inicia cu Latam ta e di tres aerolinea di Latino America cu ta bay tin vuelo pa Aruba. Latam ta bayendo hopi bon, segun Sanju Luidens, e bookings pa Aruba ta hopi halto. ATA ta premira cu e vuelo lo bay bon.
Mision di mercadeo
E siman aki Aruba Tourism Authority (ATA) y Aruba Airport Authority (AAA) ta na Chile pa despues biaha tambe pa Peru. Den e mision aki a inclui pa topa cu tres di e cinco top tour operator di Chile y ora bay Peru lo topa cu tur tres top tour operator cu ta traha cu Aruba. Nan ta compania cu ta bende pakete pa Aruba y cu ta bende Aruba cu e aerolineanan. Ademas ta esnan cu ya ta traha cu Latam Airlines y Copa Airlines.
Embahador di Reino Hulandes
E acto oficial di e biahe aki ta cu lo topa cu e Embahador di Reino Hulandes staciona na Peru. Ey lo tin un evento hunto cu embahador caminda lo tin diferente representante di Gobierno di Peru. Ademas, lo tin e entidad di turismo di Peru y hopi compania cu ta estableci na Peru. Na aeropuerto di Peru, caminda lo tin e vuelo inaugural, lo conta cu presencia di e embahador y directiva di Latam.
Vuelo combina
Chile y Peru ta parti di e Cono Sur incluyendo Argentina. E mercado Cono Sur ta bon representa den e vuelo inaugural aki. Latam Airlines a admiti cu di tur e stoelnan abordo for di Lima, ta solamente 35% ta pasahero di Peru. Un otro 25% ta for di Argentina y 25% ta for di Chile. E resto ta bin for di diferente mercado, manera Brasil.
Promocion pa Aruba
Pa e parti di mercadeo ta haci hopi cu e tour operators, pero tambe cu e agentenan di biahe. Pa mercadea na Aruba, ta trece diferente influencers pa nan promove nos a traves di nan red social. Ademas, ta hiba e prensa di e paisnan pa Aruba pa asina nan experencia y demostra kico Aruba tin pa ofrece. Pa loke ta posicionamento, ATA ta sigui cu su campaña di The Aruba Effect. Awo tin e tambe den Latino America, mescos cu na Europa y Merca. Pues awo e ta un campaña global.
Peru no ta destinacion nobo
Pa Aruba, e destinacion Lima no ta nobo. E tabata popular den añanan 80 y 90 tempo cu KLM tabata bula e ruta Aruba, Lima, Amsterdam. E tempo ey tabata bula asina pa motibo di e capacidad di avion y combustibel. Cu modernisacion y cambio di e avionnan, no tabata necesario mas. Pa mas o menos 30 aña no tabatin vuelo directo mas entre Peru y Aruba. Pues, reapertura di e ruta ta habri un opcion mas lihe y economico tambe pa e colonia di mas o menos 700 Peruano residencia y estableci na Aruba caba.
Tocante LATAM Airlines
LATAM Airlines, anteriormente LAN Airlines, LAN-Chile y LATAM Chile, ta un aerolinea multinacional Chileno cu sede na Santiago de Chile y ta un di e fundadonan di LATAM Airlines Group, holding di e aerolinea mas grandi di Latino America. E hub principal ta Aeropuerto Internacional Arturo Merino Benítez na Santiago, cu hub secundario na e aeropuertonan di São Paulo, Lima, Bogotá, Quito, Guayaquil y Asunción.
LAN tabata un aerolinea cu bandera di Chile te na momento di su privatisacion na aña 1990, e ta e aerolinea dominante na Chile, Ecuador y Perú y e ta di dos aerolinea mas grandi di Colombia, a traves di su filialnan local. LAN ta e aerolinea mas grandi di Latino America y ta brinda servicio na Latino America, Norte America, Caribe, Asia y Europa. E aerolinea tabata miembro di e aliansa di e aerolineanan Oneworld di aña 2000 pa aña 2020.
LATAM Airlines Group a forma despues di e fusion entre LAN y e aerolinea Brasileño, TAM Linhas Aéreas, cu a keda cla dia 22 di juni di aña 2012. Na augustus di aña 2015, a anuncia cu e dos aerolineanan lo cambia nan nomber completamente pa LATAM, cu un uniform cu lo aplica riba tur avion pa aña 2018. Actualmente LATAM Chile y LATAM Brasil ta sigui funciona como compania separa, bou maneho ehecutivo di LATAM Airlines Group. Actualmente LATAM Airlines Group ta e corporacion aereo mas grandi di Latino America.
