“E reunion a bay bon. Mi ta contento di anuncia cu nos ta bulando 10 biaha pa siman pa Aruba y desde e temporada halto awo, nos ta subi e frecuencia cu dos vuelo mas, yegando 12 vuelo pa siman”, asina Victoria Mackinnon, gerente general di Copa Airlines Chile a bisa. El a caba di atende un reunion fructifero cu e delegacion di Aruba na Chile, cu ta consisti di ehecutivonan di Aruba Tourism Authority y di Aruba Airport Authority.
E berdad ta cu tur vuelo di Copa Airlines ta sali for di nan hub principal, esta Panama. Pero e realidad ta cu Panameñonan mes ta forma 8% di e pasaheronan cu ta biaha pa Aruba. E mercado mas grandi den cada avion cu ta sali for di Panama pa Aruba tur dia ta Argentino, sigui pa Chile y despues Brasil. Un otro mercado cu sa haci hopi uzo di Copa Airlines pa yega nan destinacion ta Colombianonan bulando for di of pa Aruba.
Cinco vuelo pa siman ta sali for di Chile
E gerente general di Copa Airlines Chile a splica cu di e 10 vuelonan cu ta sali pa siman for di Panama pa Aruba, mita di nan, esta cinco vuelo ta origina for di Santiago de Chile. Pues pasaheronan ta subi di Chile, pasa Panama, busca mas pasahero y sigui pa Aruba. Y ta su intencion pa aumenta e cantidad di vuelonan mas, segun e demanda tambe ta sigui subi.
Chile ta un mercado creciente
Cu recuperacion economico di Chile despues di e pandemia, Copa Airlines Chile ta convenci cu e esfuersonan di Aruba Tourism Authority pa haci mas promocion y campaña den e mercado, sin duda lo traduci den mas interes di Chilenonan pa biaha pa Aruba. E realidad ta cu e vuelo ta largo, algo mas di seis ora di Chile pa Panama, mester keda ey un rato di transito y un otro dos ora mas pa bula pa Aruba. Na tur bo ta pasa como 10 ora den e trayecto di Chile pa por yega Aruba.
Kier topa mas Rubiano na Chile
“Pero nos kier haya mas Rubiano tambe aki banda. Chile tin hopi pa ofrece”, asina e gerente general di Copa Airlines Chile a invita. Nan ta un pais situa den tres continente simultaneamente, den Latino America, den ocean Pacifico y den Antartica. Chile ta un pais sigur, cu seronan halto y sin lubida cu nan ta ofrece e miho biñanan di mundo.
Lo sigui bula via Panama
Plannan pa un vuelo directo di Chile pa Aruba no ta cla ainda, pero ta den tapara for di masha tempo. Pa awo nan ta enfoca riba aumenta e demanda y consecuentemente e vuelonan for di tur parti di mundo pa Panama y djey pa Aruba. Di e forma ey ta consolida e mesun avion cu pasahero cu ta yega di varios destinacion pareu. E rol di hub ta traha perfecto na Panama, pa cual pa awo, Copa Airlines lo kier sigui pusha y promove.
Gerencia nobo
Victoria Mackinnon tin apenas shete luna na timon di e aerolinea Copia Airlines na Chile. Ta na luna di mei ultimo el a drenta den servicio y mesora a hacie e gerente general. E tin seis aña y mey di experencia como sales manager di Delta Airlines pa Chile y Ecuador. Despues a traha 11 aña como subgerente comercial na Cocha Corporate, pa despues yega Copa Airlines. Ey e ta combina su conocementonan hunto y ta traduci den crecemento di mercado. E no a yega di bishita Aruba ainda pero e tin un invitacion y lo busca un buraco den su agenda ocupa pa bishita e isla di “bellezas naturales” of conoci tambe como “La isla feliz”.
Tocante Copa Airlines
Compania Panameña de Aviacion S.A., conoci bou di e nomber comercial COPA Airlines, ta e aerolinea nacional di Panama. Su oficina principal ta situa na Panama City, mientras cu su hub principal ta na Tocumen International Airport. Copa Airlines ta un subsidiario di Copa Holdings S.A. y ta un miembro tambe di Star Alliance. E aerolinea ta e operado principal y doño di e aerolinea Colombiano yama AeroRepublica, cu ta miho conoci comercialmente como Wingo.
A funda Copa Airlines dia 21 di juni 1944, bulando tres vuelo domestico den Panama mes cuminsando na augustus 1947. Ta pesey ta celebra 75 aña di operacion e aña aki. Na aña 1980, pues despues di trintitres aña, a cuminsa bula vuelonan internacional. E programa di “frequent flyer” di Copa Airlines yama ConnectMiles. Nan ta conta awendia cu 89 avion y ta bula pa 86 destinacion rond mundo.
