Recientemente, e trahadonan Stichting Voortgezet Onderwijs, cu ta maneha Colegio Arubano, a haya un carta, fecha 14 di juni, den cual e actual presidente, mr. Ernesto Rosenstand di SVOA, ta informa tur su trahadonan cu entrante prome di augustus 2021, tur trahado ta prohibi pa haci un otro trabou pafo di e oranan di scol. (Adhunto e carta di Rosenstand na personal di Colegio Arubano)Ta trata di tur tipo di trabou, e.o. examenbureau, curiculo, Universidad di Aruba, bijles, etc…
E enfasis den dicho carta tabata riba e docentenan cu ta labora na Avond Havo Aruba. Acerca, e presidente ta menciona cu pa esunnan cu haci esaki toch, lo tin sancion. E carta aki no a bin sin antecedente. Siguientemente lo elabora riba probabel motibo pa kico.
Desde cu Minister di Enseñansa, dr. Lampe, a nombra su abogado y amigo, mr. Rosenstand, den e funcion di presidente di SVOA aña pasa, proposicion y maneho dudoso a cuminsa tuma luga den dicho organisacion. Un di e manehonan ta e cuestion cu minister kier elimina Avondhavo, cu tin 52 aña di existencia y pone esaki bou maneho di SVOA. Esaki no a logra, pues Minister di Enseñansa Lampe a entama caso contra SKOA y Avondhavo. E abogado cu a representa Minister di Enseñansa tabata Mr. Ernesto Rosenstand, mientras ta e mes ta presidente di (SVOA) Colegio Arubano.
Minister di Enseñansa Lampe a perde caso contra Avondhavo. Pues, pa tuma represaya den su afan pa toch logra su meta, a laga su amigo Ernesto Rosenstand prohibi tur docente di Colegio Arubano pa sigui duna les na Avondhavo entrante 1 di augustus 2021. Consecuencia di e medida abrupto aki ta cu e problema ta mas grandi cu pa Avondhavo so. E interes y bienestar di tur cu kier y/of mester caba un estudio riba nivel Havo/Vwo, minister Lampe y consorcio no ta tene cuenta cu nan.
Aki ta sigui algun consecuencia di e decision di Minister di Enseñansa:
1. No tin alternativa mas pa e studiantenan cu no slaag na dagschool of pa un of otro motibo no por a sigui den dia.
2. Esunnan cu kier sigui desaroya nan mes door di logra nan Havo/Vwo diploma na Avondhavo, lo perde e oportunidad aki.
3. E docentenan di Colegio Arubano no ta permiti pa duna bijles mas na ningun alumno na Aruba. Hopi alumno ta perde e yudansa valioso aki.
4. E docentenan di Colegio Arubano lo no por traha examen mas na Examenburo, cu consecuencia cu no lo tin examen mas traha na Aruba, cu contexto cu e studiantenan custuma cu ne. Lo mester cumpra examen di afo (cu ta costa Land Aruba hopi mas), cu tur consecuencia cu esaki por bin cu ne.
5. E docentenan di Colegio Arubano lo no por duna les mas na Universidad di Aruba, cu tambe tin su consecuencianan cu ne.
6. E docentenan di e seccion di expresion tampoco por duna les na e di arte, drama, musica, baile etc… ya cu nan ta prohibi.
Mester aclaria cu e docentenan di Colegio Arubano, ta profesionalnan prepara, cu nan experticio y hopi aña di experiencia. Esunnan cu ta haci trabou pafo di ora di scol ta comparti nan experticio pa algun ora, sin perhudica nan funcionamento diario. Netamente ta pasobra tin escasez grandi di docente riba e nivel di esunnan cu ta traha na Colegio Arubano, hopi docente ta haya nan mes yama pa comparti nan experticio den diferente otro institucion educacional pa asina e institucionnan aki, na nan turno, por brinda nan servicio. Danki na esaki, hopi studiante y adulto por logra nan meta pa cu enseñansa (aki na Aruba mes).
Pero, e minister di enseñansa ta pensa contrario. E no ta pensa riba e embergadura di su accionnan, ni riba bienestar di enseñansa na Aruba. Tur e prohibicionnan aki, cu ta trece consecuencia grave cu ne pa enseñansa na Aruba, ta pa motibo cu e Minister di Enseñansa a perde e caso contra Avondhavo y no por a logra su metanan.
