“Trabou cual mi ta stima, no pa e trabou ariba su mes, pero pa e trabou cual mester wordo haci. Si tur hende bisa lag’e pa otro haci, e ora niun hende ta haci algo. Mi ta considera esaki e ora tambe como mi deber”, tabata e palabranan di Boy Ecury. E proyecto BUSCANDO BOY, lansa na februari di e aña aki, a yega su final cu e develacion di un Mural y un Obra di teatro dedica na Boy Ecury.
E proyecto ta un homenahe transnacional pa e hoben heroe di Aruba cu a duna su bida dia 6 di november 1944 pa libertad di Aruba y Hulanda. Un hoben extremadamente balente y integro cu te awendia ta un ehempel pa nos tur.
Stichting Cultuurparticipatie a nota e falta di un mural dedica na nos propio heroe di Segunda Guera Mundial y asina hunto cu Colegio San Antonio, Filomena College Mavo, Muchila Creativo, MBO Media Collge Amsterdam, Monumentenfonds Aruba, a bay en busca di Boy.
Durante e proyecto aki e alumnonan a investiga e archief digital di famia Ecury. E archief aki a keda digitalisa pa Archivo Nacional Aruba y Nederlands instituut voor oorlogsdocumentatie. E investigacion aki a forma e base pa nan expresion creativo den e tayernan di teatro, poesia y arte visual.
E artista Esmeralda Kelly a crea un mural riba e muraya na Filomena College, inspira pa e ideanan di e studiantenan durante nan tayernan bou di direccion di Esmeralda Kelly y Rudberth Wolff. Den presencia di Gobernador di Aruba, sr. Alfonso Boekhoudt, Minister di Cultura, Minister di Enseñansa, y algun miembro di famia Ecury, a devela e bunita mural aki.
Seguidamente e invitadonan a dirigi nan mes na escenario principal di Aruba Art Fair caminda e studiantenan di Colegio San Antonio a presenta un tableau vivant cu acompañamento musical di alumno y maestronan di Muchila Creativo. A crea e tableau vivant aki dedica na Boy Ecury hunto cu nan coachnan di teatro Lupita Bernabela y Jhon Freddy Montoya.
E studiantenan di MBO Mediacollege Amsterdam cu a bin Aruba pa e final di e proyecto lo traha un documentario cortico di e proyecto. Tambe a haci presentacion na e alumnonan pa asina comparti un tiki di e resultado di nan investigacion tocante Boy Ecury. Publico lo por admira e obranan di e alumnonan di Filomena College na Biblioteca San Nicolas.
Un aña extraordinario di cooperacion transnacional pa comparti y honra nos heroe nacional di Segunda Guera Mundial, Boy Ecury, y asina reflexiona hunto tocante nos propio curashi. E heroenan di awendia y nan lucha contra exclusion, crueldad y racismo.
