Den un ambiente den naturalesa na Ayo Rock Formation, a tuma luga awe, diamars 17 di October, firmamento di un protocol entre e tres partidonan MEP, POR y RED, cual a tuma luga durante oranan di atardi. Formador y lider di MEP, Evelyn Wever-Croes, a splica cu a invita prensa na e sitio, un luga caminda cu tin hopi historia, hopi hende ta haya inspiracion y despues ta yega na e punto di reparticion di cartera.Wever-Croes a pasa riba e lineanan grandi den e documento cu nan a firma ayera ta yama “Hunto pa Aruba.” Riba e documento e colornan di e partidonan politico ta combina den e colornan di Aruba, pasobra a laga e color di e partidonan politico un banda, pa bay traha pa Aruba.
Den lineanan grandi, e acuerdo di formacion aki ta basa riba tres pilar, tres punto importante. E prome ta Bon Gobernacion, Integridad. Esey ta algo cu a compromete pa duna Aruba. Den e siguiente Gobierno lo tin e calidad di nos democracia y institutonan democratico hopi na pecho y lo duna prioridad na un gobernacion transparente.
E di dos punto ta finansas publico balansa y duradero, pasobra logicamente si no pone ordo den e situacion financiero, no lo tin fondo cu lo por cumpli cu pueblo.
E di tres, ta pone e ser humano central riba diferente tereno.
E prome tereno cu lo haya atencion, of cu ta menciona den e protocol, sin necesariamente e secuencia, ta siguridad, pa duna e ser humano e siguridad, pa por biba den tur trankilidad. Y den e caso aki duna mas proteccion. Tambe asistencia social, nos problemanan social cu tin cu bay haya atencion pa por combati nan y brinda mas proteccion na esnan mas vulnerabel den nos comunidad. Bienestar economico, pues un desaroyo economico cu por duna, crea mas cupo di trabao y un bienestar general pa Aruba pa trece mas bienestar den cada hogar. Desaroyo sostenibel y akinan ta pone mas enfasis riba cuido di nos naturalesa y medio ambiente, enseñansa di calidad, pa asina prepara nos siguiente generacionnan riba economia di futuro. Un cuido riba nivel halto, esta cuido di salud, cuido di nos grandinan, na un nivel halto. Vivienda pa un y tur, pasobra ta convenci cu tur hende cu ta residente na Aruba, merece di tin un dak riba su cabes y mester percura pa tin tereno y vivienda. E punto di acuerdo di e formacion, cual Wever-Croes a menciona, cual tambe otro puntonan di atencion, manera por ehempel, infrastructura, deporte, transporte, comunicacion, sector primario, asuntonan di reino, imigracion integracion, energia sostenibel y cultura, lo keda amplia y elabora den e programa di gobernacion 2017/2021.
Esaki ta den lineanan grandi e acuerdo di formacion cu partidonan MEP, POR y RED ta firma. Mester bisa cu den esaki por mira e linea grandi di locual cada partido a bay campanja cun’e y cu lo bay enfoca den un Gobernacion.
