E presupuesto 2019 ta na caminda. Ya caba esun di 2018 su concepto a keda entrega na Parlamento. Esun di 2019, mester ta entrega prome cu 1 di September. Prome Minister, Evelyn Wever-Croes a menciona cu den e presupuesto cu ta bin, no por conta Citgo den e presupuesto aki tampoco. Naturalmente ora cu ta cuminsa, na Augustus por ehempel ora cu tin cu finalisa e presupuesto y e situacion cambia, bo lo por tene cuenta cun’e. Awor aki, cu e informacionnan cu a haya e siman aki, no ta duna ningun indicacion cu pa 2019, lo bay tene cuenta cu reapertura di e refineria.
Mester deal cun’e
Actualmente por bisa cu e Citgo cu ta negoshando tin un laso estrecho cu PDVSA di Venezuela. Segun prome minister, e refineria di Aruba ta den man di Citgo cu ta situa na Delaware Company, cu ta den man di PDVSA Holdings. Esey ta e motibo di e sancion. No ta cuestion cu nos a scoge cua Citgo pa deal cun’e. Esey ta e doño di e contract cu tin na Aruba y pesey tin cu deal cun’e.
Luz na horizonte
Pa loke ta e situacion cu Citgo despues di e prome reunion, prome minister a menciona cu tin cu purba di busca e parti positivo di tur cos, pero realista. E noticia cu a haya di e bishita di Citgo e siman aki, tin cierto puntonan positivo den dje. Uno ta cu tin un dialogo, tin un combersacion. No ta manera na principio cu tabata tin comunicacion. Tin cu admiti tambe cu ora cu a drenta den Gobierno, mayoria di esnan cu Gabinete Mike Eman a negosha cu nan, a keda deteni. Ta dificil pa haya nan pa papia cu nan deteni na diferente prizon rond mundo. Pero despues, ora cu a cuminsa regroup, a cuminsa apunta ehecutivonan nobo, a tarda un rato prome cu a haya e informacion y esey tabata hopi frustrante como gobierno. A cera un aña cu un deficit adicional debi na asuntonan di refineria y tabata hopi frustrante pa mester a tuma e decision eynan, sin cu a haya contesta di esun cu tin cu contesta.
Awor aki cu tin un liña di comunicacion, por cuminsa papia bek y reestablece un relacion di confiansa entre e gobierno aki y e ehecutivonan di Citgo. Con cu bay bin, ta mara cu otro den un contract. Esey ta un parti positivo, segun e mandatario.
Un otro parti positivo di e reunion ta, cu e slowdown cu a keda anuncia cu mester a kita mama y tata for di famia, awor aki ta draai bek. No ta core e riesgo cu hendenan ta bay perde trabao. Esey ta algo personalmente, e minister ta haya cu ta dunando un trankilidad hopi mas grandi. Esey ta momento cu nos pais ta pasando cual ta hopi dificil pa hendenan perde trabao aki. Cu e no a genera hopi trabao nobo y empleo nobo mes, ta un dolor caba. Pero cu esnan cu si a haya empleo bay perd’e, e ta preocupante. Esey ta un otro parti positivo.Pero mes momento ta realistico y sa tambe cu e solucion no ta riba mesa ainda. Por bisa cu e intensionnan ta mustra cu nan tin ta bon, pero no sa si ta haya e posibilidad pa haci’e. Si puntra e prome minister si e ta trankil y awor si e sa cu e deal aki ta bay door y e ta trece bienestar pa Aruba, e no por contesta cu siguridad.
Estudio
E estudio riba e contract ta sigui. Awor aki e interes di Aruba ta conta. E interes di Aruba ta wordo sirbi si prepara pa cualkier otro plan. Sa cu a wordo critica pa e hecho cu ta mirando den direccion di otro alternativanan, pero asina e ta hinca den otro. Prome minister ta menciona cu e ta prefera pa ta bon prepara pa algo pasa, tin mesora un fall back scenario pa cay bek riba dje.
Prepara
Citgo sa cu gobierno ta studiando e contracto. Nan ta hopi habri den esaki. Segun Evelyn Wever-Croes, nan mester sa pasobra e informacion cu e abogado ta pidiendo for di e propio Citgo tin cu pidi’e. Pasobra gobierno di Aruba no a percura pa tin tur e documentonan aki in place pa ta bon prepara pa cualkier eventualidad. Citgo sa esaki. A bisa nan tambe pasobra semper mester ta bon prepara y a splica nan. No a haya un traspaso di gobierno anterior. Tin den full e liña di evento cu a tuma luga pa loke ta e negociacion di Citgo, tin hopi gap, tin hopi buraco cu ainda no por yena. Si nan tin interes pa keda na Aruba, ta cumbini nan pa traha hunto cu Gobierno, cual nan ta haciendo tambe.
Tiki mas claridad
Ta dificil pa bisa den tur dos trayecto cu ta canando ki dia lo keda cla pa financiamento. E minister no por duna un idea den ki tempo e ta keda cla. Di parti di Gobierno e tempo cu nan ta bezig ta revisando e contract, tampoco no sa. Na principio e tabata hopi optimista na principio, aunke e ta decepciona cu e ta tardando hopi. Pero di un otro banda e sa cu pa haci un cos bon, tin cu tuma tempo y esey ta locual cu nan ta haciendo tambe. Ta trata aki di interesnan grandi. Semper lo sali di un contracto di e refineria si e no tin riesgo pa Aruba. Na e momentonan aki Aruba no por carga ningun riesgo mas. Ni loke Aruba por carga, e no por. Corda busca aventura den riesgonan nobo. Y pa evita sali cu riesgo, tin cu pense bon, tin cu plani’e bon, tin cu strategi’e bon.
