Diaranzon ultimo Director di Refineria di Aruba N.V. (RdA), esta Alvin Koolman, acompaña pa e hunta di supervicion di RdA, expertonan y miembronan di gerencia di RdA como tambe ehecutivonan di CITGO Petroleum y CITGO Aruba, a sinta na mesa pa haya aclariacion riba e proceso cu ta tumando luga en conexion cu reapertura di e refineria na Aruba.
Despues di e anuncio di “slow down” na Februari ultimo debi na con tabata maneha e proyecto, a laga un incertidubre den comunidad pa locual ta trata e reapertura di e refineria situa na San Nicolas, conhuntamente cu e sancionnan cu Merca a impone, cu a trece retonan adicional pa realisacion di e proyecto pa CITGO.
Sinembargo, Refineria di Aruba NV no a para keto y a monitoria tur e pasonan di CITGO. Den e cuadro aki tambe a percura pa un reunion oficial tuma luga pa asina tur entidad necesario ta na altura di e status actual specialmente pa locual ta trata CITGO Aruba. E reunion tan anticipa a bay den un ambiente hopi profesional unda abiertamente a keda determina cu e reapertura di e refineria na Aruba ta uno importante pa tur partido na mesa.
CITGO a demostra un determinacion pa continua cu e plan pa comberti e refineria den un “Upgrader” manera ta stipula den tur e acuerdonan. Na e momentonan aki CITGO a scoge pa continua y desaroya e plan total basa riba un strategia nobo.
Refineria di Aruba NV tin como parti di su ekipo expertonan cu amplio conocimento di operacion di un refineria den tur su ramonan en general pero tambe specificamente di e refineria di Aruba y su historia completo. RdA abiertamente a ofrece CITGO un man pa fungi como consehero brindando un sosten adicional den henter e planificacion, percurando pa e meta keda cumpli debidamente. Kisas te hasta esaki por acelera e proceso mirando cu ta e propio entidad aki lo tin cu controla e trabounan pa mira si enberdad tur trabou ta acuerdo e palabracionan haci y segun e contractnan firma. CITGO a brasa e idea aki totalmente.
Cu un meta den comun tur e entidadnan envolvi ta determina pa hunto traha pa e proyecto ta uno exitoso, unda ya ta comproba cu lo tin efectonan beneficioso pa Pais Aruba.
Mientras cu ainda tin algun detaye tecnico cu e ekipo lo kier mas aclariacion y detaye riba nan, RdA sigur lo keda den contacto cu e ehecutivonan di CITGO, asina e director di RdA a indica. Alvin Koolman a comenta: “Lo continua cu e tipo di reunionnan aki tur luna pa percura cu e canal di informacion keda habri. Di e forma aki lo por preveni hopi speculacionan eroneo pa locual ta trata e proyecto di CITGO Aruba. Awor ta mas sigur cu tur partido ta riba e mesun linea y tin e mesun meta. Conhuntamente nos lo sigui traha duro pa concretisa esaki.”
Despues di e reunion diaranzon ultimo a nota un aire positivo unda ta mira claramente e necesidad di un union entre CITGO, RdA y Gobierno di Aruba pa percura pa e logro y concretisacion di e proyecto di Refineria di Aruba.
