Despues di anuncia e medidanan cu gobierno ta introduci pa e ultimo dianan di aña cu tin como meta evita aglomeracion y mas contagio, tin algun recomendacion cu e mandatario tin pa tur hende. Esaki ta pa evita mas tanto contacto, durante cambio di aña y e coremento di paranda di Dande.
E medidanan introduci, prome minister Evelyn Wever Croes a splica, no ta nifica cu famianan ta keda sin ricibi bishita na cas. Toch ta urgi e ciudadanonan sinembargo limita e cantidad di bishitanan cu ta ricibi ta na p.e. 10 hende paden (si tin espacio pa mantene distancia social) y pafo e ta maximo 25 hende. “Polis por actua si esaki sali for di man y no tin distanciamento social.”
E otro recomendacion cu e mandatario a papia di dje ta Dande. “E ta un tradicion cu nos a lanta den dje. Pero Dande lamentablemente ta un riesgo ora cu nan ta pasa di cas pa cas, cu e riesgo cu nan por piki e virus y hib’e na e siguiente casnan cu nan bishita.
Dande por bira un “super spreader” si permiti e tradicion e aña’ki. Nos no por bay permiti cu despues di hopi luna di tanto sacrificio cu nos mes ta bay plama esaki rond.”
Pa e motibo ariba menciona, prome minister ta urgi pa no tin paranda di Dande. E ta spera cu e ciudadanonan por scucha e Dande na radio of den forma virtual. “Ta urgi boso pa evita e parada ya cu bes di trece bendicion, e por trece e maldicion di e virus.”
