Despues di su bishita di trabou na Den Haag, Prome Minister Evelyn Wever Croes a regresa Aruba totalmente satisfecho y a ser ricibi manera un heroe pa un logro cu realmente no ta rekeri heroe.

Durante di conferencia di prensa riba  henter e asunto entorno cu su gobierno a logra di evita implementacion di un ‘aanwijzing’ dor di Hulanda, Prome Minister a bolbe sali bisa cu Hulanda ta impresiona cu progresonan cu su gobierno ta mustrando den e proceso di saneamento di finansa publico.

Lider di fraccion di AVP, sr Marlon Sneek a mustra cu na mes momento segun Prome Minister, tambe a bin dilanti cu Hulanda ta bon na altura di e situacion financiero cu gobierno di AVP cu Mike Eman na cabes, a laga e pais aden, caminda e Premier a papia di presupuestonan cu cifranan irealistico y cu a conduci na e hecho cu awe su gobierno ta confrontando e problemanan cu tin.

Segun sr Sneek na varios ocasion pa no bisa cu practicamente tur miembro di gobierno di MEP,  parlamentarionan di partido MEP, no por duna un solo declaracion durante di un conferencia di prensa sin menciona partido AVP, como si fuera cu nan bida ta liga na e partido berde pa semper.

“Sinembargo na momento cu Prome Minister ta papia cu gobierno di AVP a traha presupuestonan cu cifranan irealistico, na mes momento e ta pone duda den integridad di e trabou di e comision di supervision financiero, esta CFT.

Gabinete Mike Eman II tabatin confrontacion serio cu Hulanda relaciona cu e comision aki pero despues a logra di cumpli cu normanan stipula y CFT ningun momento a yega di pidi un ‘aanwijzing’ pa motibo cu gobierno di AVP no tabata cumpli cu normanan stipula.

Al contrario prueba concreto cu gobierno di AVP a cumpli cu normanan stipula a wordo confirma pa nada mas y nada menos e propio Prome Minister actual di Aruba, Evelyn Wever Croes.

Den un carta dirigi na Presidente di Conseho di Minister di Reino fecha 7 di oktober 2019, cu ta un luna pasa, Prome Minister Wever Croes den su intento pa evita ehecucion di e aanwijzing ta mustra lo siguiente na Prome Minister Rutte:

‘Sinds de invoering van LAFT in 2015, heeft Aruba aan de afgesproken normen VOLDAAN, met uitzondering van de jaren 2017 en 2018.”

Pues Premier ta informa Prome Ministeer Rutte cu gabinete Mike Eman II a cumpli cu palabracionnan haci y na mes momento ta confirma loke gobierno Hulandes tambe ta na altura, esta cu na 2017 no a cumpli cu e normanan stipula ya cu su gobierno cu a  caba di tuma mando di gobernacion, a dicidi di trece diferente cambio den e presupuesto supletorio cu a pone cu no a cumpli cu normanan palabra.

Pa colmo parlamentarionan cu ta sostene gabinete Wever Croes a dicidi di no aproba e cuenta anual di 2016 cu a crea otro problema serio pa e maneho cu Minister di Finansa mester  a sigui despues, algo cu e propio Minister a yega di señala.

Pues practicamente Prome Minister Evelyn Wever Croes a usa e maneho di gabinete Mike Eman II  pa e por a defende su mes contra di Conseho di Minister di Reino y asina haya otro oportunidad pa bin dilanti y mustra cu su gobiero tampoco ta traha cu cifranan irealistico,” Parlamentario Marlon Sneek a declara.

Comments

comments