Awe marduga Warda Costa (Kustwacht) di Caribe Hulandes, staciona na Aruba, patruyando den nos awanan teritorial, a nota un embarcacion riba lama.
A mobilisa mesora pasobra e boto tabata biniendo nort den awanan di nos isla, procedente di Venezuela. A duna instruccion pa para. A resulta cu e boto tabata biniendo Aruba cu 35 ilegal abordo.
Warda Costa a stroba nan entrada y a instrui pa drenta waf di Playa. Eynan a cuminsa un investigacion mesora. A detene e capitan. A transporta tur demas pasahero pa edificio di Warda Nos Costa pendiente un investigacion.
Ta bon pa splica cu ser ilegal no ta un hecho criminal den nos leynan penal, sinembargo e Capitan di e boto si tin cu enfrenta acusacionnan serio awo di mensen handel y mensen smokkel.
Esaki ta otro logro di Warda Costa di Aruba cu ta trahando duro pa evita entradanan ilegal. A confisca e boto tambe den e proceso. Polis tambe tabata envolvi for di marduga den e proceso pa transporta e ilegalnan pa centro di Warda nos Costa banda di Aeropuerto.
A activa personal di DIMAS mesora pa procesa tur e posibel peticionnan pa “Asilo Politico” mesora awe mainta trempan di biaha, pa evita proceduranan largo y complica. Esaki ta un di e “aanlanding” nan di mas grandi den e ultimo tempo, por lo menos cu nos sa di dje.