Den e auditorio na Iglesia Piedra Plat 24 di januari ultimo den presencia di Minister di Finansa, Asuntonan Economico y Cultura Xiomara J. Maduro hunto cu algun famianan y e congregacion di Iglesia mes. A honra y reconoce Sr. Bicento Henriquez, como e prome pastoor Arubiano Evangelico y escritor di diferente tratadonan y buki na Papiamento.
Bicento Henriquez a nace dia 19 juli, 1923 (97 aña) na Aruba, un Arubiano “di pura cepa” como su mama, tata, welo, wela, bisa welo/wela tur a nace riba e pida baranca aki! Di chikito el a lanta ta core den e mondinan y cunucunan rond den e barionan di Noord, subiendo baranca, bulando di un pa un, anto pia abou! El a cuida carne, cabritonan, y core buriconan den e cunucu di su tata yama “Boneriro” na Noord, unda nan a planta maish’i rabo, pampuna, bonchi largo, patia, melon, etc.
El a lanta como un cunukero di curason. Su mama y tata tabata asisti na e Misa di Noord, unda Bicento tambe a asisti y batisa. Como mucha e tabata asisti den tur e actividadnan religioso manera resamento, siña catasashi, bautismo, y haci responde pa Pastoor.
E no por a sigui cu school despues di seis klas. pasobra e mester a yuda su tata como metsla pa yuda den e gastonan di cria e famia. Pues ta cerca su tata el a siña e trabou ey, te un dia e mes por a lanta su mes cas den e bario di Kamay. Segun cu el a crece, e tabata masha social y popular den barionan di Noord, te cu el a bira parti di un grupo musical y tabata toca guitara den e conhunto e tempo ey, tocando y cantando pa eventonan social. E evento di tur fin di aña cas pa cas cantando “Ay No Be” pasando rond cu su sombre! E tabata gosa loke e tabata pensa ta bida.
Yong y Yen di energia, Bicento a drenta dienst y a sirbi como solda tres aña y ocho luna durante añanan 1942-1945, tempo di Segundo Guera Mundial. Tur e tempo ey e soldanan tabata na estado alerto, ma nunca mester a laga Aruba.
Despues di a sirbi den dienst el a drenta den servicio di Lago Oil & Transport Co. Como aprendis unda el a siña masha hopi y a siña domina e idioma Ingles. Den e temponan ey como hoben di binti dos of binti tres aña el a n’amora di un señorita no mucho leu di su mes cas. Dia 4 di juni el a uni den matrimonio cu Ursula Tromp, na misa di Noord.
Recien casa el a tende e EVANGELICO na LAGO na pia di trabou. Door di un testimonio fiel di su mes hefe di trabou. Su hefe tabata lesa Scritura tur merdia sinta na canto di muraya, cu bos duro pa tur esnan sinta rond of cu ta cana pasa bay, por a bin scucha. Bicento a para scucha un dia, y el a para scucha aunke cu un spirito resistente fuerte den principio, ma no a dura mucho tempo cu Bicento su mes a cana di Noord pa Playa pa e cumpra su propio Testament Nobo. Poco poco el a cuminsa lesa e Palabra di Dios pa su mes.
El a wordo convenci cu e ta un pecador bou di condenacion y mester arepenti y kere den e salbacion ofreci na hende cu ta solamente pa medio di Cristo. E mes a hinca rudia na su cas, a admiti, arepenti y a acepta e salbacion ofreci na tur cu kere den e morto y resureccion di Cristo Hesus. Sr. Bicento a laga e bida di paranda y su bida a cambia completamente.
Sr. Bicento a bira discipulo di misioneronan di TEAM (The Evangelical Aliance Mission) y a sigui estudionan homiletico y predicashi.
Asina tambe Sr. Bicento a desplega como e prome Pastoor Arubiano Evangelico na Aruba y a eherce Iglesia Alianza Evangelica for di 1959 pa mas di binti aña.
Escritor di diferente tractadonan y buki na papiamento manera: BO PREGUNTANAN CONTESTA, PIPITANAN DI ORO y a traduci THE WAY TO GOD by Dwight L. Moody – E CAMINDA PA DIOS.
Sr.Bicento tabata miembro den e prome comite forma pa traha cu e traduccion di e Bijbel completo na Papiamento. E prome persona cu a duna noticianan internacional na Papiamento na Radio Victoria. E prome Pastoor nativo radial cu programanan na Radio Victoria. A haci transmision di e Sirbishi di Adoracion di tur Diadomingo, e programa E BIJBEL HABRI, BO PREGUNTANAN CONTESTA, E PALABRA, HUBENTUD PA CRISTO.
Sr. Bicento a forma parti di un di e tres firmantenan di e acta notarial pa lanta Stichting Centro Juvenil Washington y asina a forma parti di e prome Hunta di CJW.
Su prome señora a fayece despues di un matrimonio di 50 aña y ocho yiu y nieto/anan te cu di 4 generacion.
Na December di 1998, el a casa cu Elizabeth Ratzlaff. un Misionera Canades cu a sirbi na e islanan ABC pa cuarenta y shete aña. Actualmente nan ta bibando na Huize Maris Stella, Seccion Wanglo, Kamber 43, ya pa cinco aña.
Nan ta gosando di cada dia cu Señor duna nan y ta fiel cu nan devocion y oracion tur mainta tempran. Tambe nan ta lesa corant tur dia y ta al tanto di tur loke ta pasando na Aruba y internacionalmente.
Betty ta maneha su laptop y e tin su conexion di internet y e ta comunica cu su hendenan via di email y nan tin un celular tambe, pero e carchi ta caba hopi lihe y no ta ora tin e manera pa cumpra. Nan deseo y oracion ta pa caba nan careda aki cu victoria, confiando den Hesu-Cristo cu no ta cambia nunca, ma ta keda semper mescos. Full e ceremonia aki por ser mira ariba facebook page di #IglesiaPiedraPlat.
