Di acuerdo cu cifranan di produccion publica pa OPEP, e compania di petroleo estatal di Venezuela, Petroleos de Venezuela SA (PDVSA), ta sigui tin un aña record y no di e forma cu e lo a spera. Na April, e Gobierno socialista cu ta controla e reservanan di petroleo mas grandi na mundo, no a logra produci na un tasa superior manera cu el a haci 70 aña pasa.
Na April, e produccion di PDVSA tabata riba un promedio di 1.436 miyon di bari pa dia, su nivel mas abao di produccion desde aña 1949. Ademas, na october, un tankero Venezolano a dal contra e waf petrolero di e pais, loke a provoca un retraso den entrega di 5 miyon bari di crudo.
PDVSA ya caba a lucha cu problemanan di capacidad e aña aki, despues cu Conoco-Phillips a enforsa un resolucion di Corte cu ta otorg’e 2 biyon dollar Mericano na compensacion pa e activonan confisca ora cu Venezuela a nacionalisa dos di su proyectonan.
E sancionnan Mericano a contribui na un falta di fondonan necesario pa drecha y reanuda e servicio di entrega di crudo. Claramente cu e sancionnan so no ta e causa di e problemanan di Venezuela, pero nan ta proporciona sigur un “zondebok” conviniente pa e regimen di Presidente Maduro. Di su parti, e Presidente di Venezuela a busca ayudo for di e Republica Popular di China, cu no ta mara na e restriccionnan imponi den e sancionnan.
China a priminti 5 biyon dollar Mericano den apoyo na e estado Venezolano y su industria petrolero den crisis. Ademas, Presidente Maduro ta planea pa impulsa exportacion di petroleo pa China como parti di un plan mas grandi pa recupera e economia Venezolano door di boost produccion di petroleo na un miyon bari pa dia, desde luna di juni di e aña aki.
Hasta si a logra e obhetivo aki, e produccion ta mas abou cu e produccion di PDVSA na 2017, ora e nivel di produccion promedio diario di e compania tabata di 2.9 miyon bari pa dia. Venezuela tin un caminda largo pa cana si nan kier bay bek na e nivelnan maximo di produccion cu e estado socialista a sostene; Nivel di produccion alcansa den añanan 90.
Y esey ta e rais di e problemanan di Venezuela. E pais a construi un burocracia estatal socialista masivo riba lomba di un exportacion, un exportacion lucrativo sin duda. Pero uno cu, apesar di tur e balor, no lo por sostene riba su mes, si e impuesto na e estado Venezolano y su multiple programanan una bes cu e prijsnan di crudo a cay y otro actornan regional, manera Merca, a cuminsa na impulsa produccion. Venezuela a empeora e cosnan ora a nacionalisa e activonan di propiedad stranhero: nan a keda cu e mashinnan y e material, pero ningun di e expertonan di Conoco-Phillips di mundo, cu ya no ta traha mas den e depositonan mas lucrativo.
E ayudo di e Chinesnan lo yuda wanta e colapso di economia Venezolano, pero ta su hendenan ta e unico cu por forsa e reformanan necesario pa saca e pais Suramericano for di e buraco scur di e desaster economico den cual e ta cayendo. Pa bon di su hendenan, ta spera cu no a crusa e horizonte di e eventonan singular ainda, pa e reforma yega Venezuela na tempo.
