Aunke e no a cumpli 18 aña ainda, pero e beneficio cu prinses Amalia lo ricibi otro aña ya ta aumentando. E prinses heredero lo ricibi un toelage entrante december 2021 pasobra e lo bira mayor di edad. Entrante di e momento ey, e por conta cu mas di 1,6 miyon di euro anualmente.
Di esey, 296 mil euro ta pa salario, e 1,3 miyon di euro restante ta destina pa gastonan di personal y material. E gabinete ta anuncia cu e montante total lo aumenta na 47 mil euro anual debi na un ahuste di prijs cu tambe lo wordo aplica na e funcionarionan. Amalia lo cumpli 18 aña dia 7 di december otro aña y lo ricibi 111 mil euro como toelage e luna aki.
E acuerdonan riba e montante aki di toelage y cualkier ahuste di prijs a wordo estableci den un ley cu tabata na vigor desde 2009. Su Mahestad Rey Willem Alexander, Reina Maxima y prinses Beatrix (como ex reina) tambe ta ricibi un beneficio estatal como salario, mas un toelage pa gastonan di personal y material. Por ehempel, Willem-Alexander lo ricibi mas di 6 miyon Euro otro aña, un miyon di cual ta wordo destina na salario. Maxima lo ricibi un total di mas di un miyon, Beatrix mas di 1,6 miyon.
Gobierno ta spera cu Cas Real lo gasta 860 mil den costonan di biahe otro aña, hasta cu avionnan di gobierno y e Gulfstream di e Forsa Aereo Real.
