El a lucha pa algun aña cu un guera pisa cu Alzheimer, pero lamentablemente Coronavirus a bati na su porta y den algun tempo a apodera di su pulmon y finalmente a fayece. Dichi Habibe a bay laga un leyenda atras cu mester sirbi como ehempel pa tur e hobennan empresario cu awendia ta cuminsa un carera den negoshi. Su storia mester sirbi como inspiracion pa nos tur, pasobra cu hopi disciplina y dedicacion, Bo ta yega leu den negoshi y den bida.
Edecio S. “Dichi” Habibe tabata un hoben cu hopi ambicion. Cu 18 aña di edad, despues cu el a gradua, a haya oportunidad di bay traha na Censo, pero el a dura net 3 dia despues di mira cu su hefe cu tin hopi aña ta traha eynan tawata core un auto bieu y biba den un cas di huur. Mirando cu e lo no progresa eynan, el a tuma un trabou na Postkantoor pero aki tawata mesun storia. E ora a dicidi di bay traha cu un omo di dje cu tawatin un negoshi, yudando den oficina. Aki el a conoce e bendedonan y a cera bon contacto cu un di nan, cu a bis’e cu nan ta buscando un “sales person”. Mirando e oportunidad aki el a tum’e y asina a cuminsa bende y a resulta di ta un di e miho bendedonan. Asina el a cuminsa tambe, yudando e mesun hendenan aki despues di ora di trabou pa bende keshi blanco, ganando su placa di comision. Tur loke e tawata gana e tawata hiba Postkantoor na unda por a spaar e tempo aya.
Despues di un par di tempo el a biaha bay Merca pa vakantie y eynan a drenta un supermarket y a mira varios marca di mangel y chuculati. Tur su placa pa cumpra paña y cosnan pe, el a dicidi di inverti den e chuculatinan pa bin bende na Aruba. Un sali, un bendi! Aki el a realisa e potencial cu tin y asina a contact e agencia pa nan mand’e un cantidad di caha pa carga los, ya cu e tempo ey no tawata tin container. El a saca tur su placa di Postkantoor y cuminsa importa e chuculatinan.
Mirando cu cos tawata bay bon el a acerca su omo atrobe cu a conseh’e pa bay ABN Bank, e tempo ey, pa busca un fiansa y cu e lo para borg pe. A logra haya un fiansa cu un garantia di 2 aña pero den 1 aña di tempo el a surpasa e capital, a pidi e garantia bek y entreg’e bek na su omo.
Asina Dichi a cuminsa traha riba su mesun forsa. El a cuminsa den un cas cu el a huur di tres camber pa e cu su casa biba aden. Su negoshi a sigui crece y ora e cas a bira chikito pe, el a bay Dakota y huur un warehouse patras di Shopping Paradise. Tambe a cumpra e luga den John G. Emanstraat na unda Tip Top Candy Center tawata. Esaki tawata su oficina y na banda e Candy Center.
A funda Tip Top na aña 1959 bendiendo simplemente mangel. E negoshi a crece hopi mas na momento cu Dichi a descubri “Wise potato chips”. Mirando cu esaki tawata un exito, pa prome biaha a cuminsa importa container di chips. Aki ta unda e mester a busca 2 persona pa yud’e entrega mientras cu e mes tawata sigui bende. Despues el a descubri “Borden” Ice Cream y aki ta unda e la cumpra un warehouse mas na Dakota cu freezer den dje. E compania tawatin poco miedo pasobra nunca nan a yega di haci international export pero Dichi a insisti t’e ora el a logra pa nan bende un container.
Negoshi a bay asina bon cu despues a trece e mesun freezernan pa pone den supermarket pa exclusividad di Borden Ice Cream so. Cos a bay asina bon cu el a logra haya henter e liña di Borden cu tawatin di ice cream pa Crazy Glue y hasta verf. Asina su negoshi a sigui crece te cu el a busca diferente otro liña di producto mas entre otro Betty Crocker, General Mills, Unilever, liñanan di Spaña di cos dushi, manteca, buscuchi y hopi mas…hasta hariña e tawata bende cu panaderia.
Na dado momento Dichi a cumpra e edificio na San Nicolas na unda awe ta Gallo Rojo y eynan el a traha un ice cream shop abou y un game room na Halto. Den Shopping Paradise tambe el a habri un Delicatessen cu el a yama e nomber di su yiu muhe “Daisybelle”. Despues el a habri un ice cream shop den caya grandi band’i unda tawata KAN Jewelers y un den Boulevard na unda ta Renaissance Mall awe. Na zona liber e tawatin un negoshi cu tawata yama Juval Enterprise cu tawata exporta pa Colombia. Dichi hasta tawatin tur e mashinnan di Pac Man na mayoria refresqueria.
Na aña 1982 el a tuma un decision di traha su mesun luga den Arendsstraat. Aki e tawatin su oficinanan, su mesun warehouse patras y su freezernan tambe. E negoshi a draai pa añanan largo satisfactoriamente cu un sin fin di liñanan. Na momento cu LAGO a cera y situacion a bira dificil, Tip Top a enfoca su mes mas riba e liñanan di cuminda manera hariña, azeta etc. Tip Top tawata e tempo e unico distrubidor di azeta “Dior” y “Mazola” pa cushina.
Dichi tawata un luchado cu a cuminsa di nada pero cu su determinacion a bira un di e comerciantenan mas grandi na Aruba. E tawata un homber luchado cu gana di bay dilanti y a traha duro pa añanan largo. Su empleadonan tawata stim’e pasobra e tawata un bon hefe cu un curason noble. Hopi di nan a cuminsa y keda t’e na final cu ne. Na aña 2002, Dichi a cansa y kier a bay disfruta di su bida y descansa poco y asina a tuma e decision di bende Tip Top Agencies.
Desafortunadamente no mucho tempo despues el a confronta cu e enfermedad “Alzheimer” cu a caba cu su memoria completo, e no tawata reconoce ningun famia mas. E enfermedad aki no a vence si, e tawata saludabel di tur otro cos y pa hopi aña su famia por a gosa di dje. Ta te cu e aña ki ora e la wordo confronta cu Covid-19 cu si a logra vence cabando cu su pulmon den poco tempo. Dichi a fayece dia 14 di September 2020. Cu Dichi sosega na paz.
