Su Altesa Real, Prins Pieter-Christiaan a yega Aruba ayera for di Hulanda hunto cu e delegacion Hulandes cu a bini specialmente pa atende e Torneo di Reino cu ta cuminsa e siman aki. Na su yegada el a topa cu Minister di Husticia, mr. Andin Bikker den VIP Room na Aeropuerto. E mandatario a yama e representante di Hulanda bon bini na Aruba y a desea e delegacion Hulandes tur clase di exito.
Pieter-Christiaan Michiel, Prins van Oranje-Nassau, Van Vollenhoven, ta naci na Nijmegen dia 22 di maart 1972 y ta e di tres yiu homber di Prinses Margriet y Prof. mr. Pieter van Vollenhoven. E forma protocolario pa dirigi Bo mes na dje ta como Zijne Hoogheid Prins Pieter-Christiaan van Oranje Nassau, Van Vollenhoven. Pero den bida diario ta referi na dje como Prins Pieter-Christiaan.
Prins Pieter-Christiaan ta ruman di Maurits, Bernhard y Floris. E ta casa cu Anita van Eijk. Mester menciona cu e Prins a opta pa no pidi permiso di Parlamento Hulandes pa e casa y asina a perde e opcion pa ta heredero di e trono di Reino Hulandes y su miembresia na Cas Real. Ta bon pa bisa cu e yiunan naci di e matrimonio ta carga e fam Van Vollenhoven y no ta posee un titulo noble. Su yiunan yama Emma Francisca Catharina y Pieter Anton Maurits Erik.
