Den un carta fecha 9 di augustus y firma pa presidente di Sindicato di Polis Arubano (SPA), esta Rodney Solognier, polisnan a pidi minister-president mr. Evelyn Wever-Croes su atencion urgente pa un lista di puntonan importante den Cuerpo Policial Aruba. Ta bisto cu e sindicato a pasa tras di Minister di Husticia demisionario, mr. Andin Bikker y a bay directamente na cabes di e gobierno cu e retonan aki pa e soluciona sea ta awo mesora of na momento cu formalisa formacion entre partidonan MEP y RAIZ.
Un di e prome puntonan di atencion di parti di e polisnan ta e decision di dokter di control na Bedrijfsgeneeskundige Dienst (BGD), cu a dicidi, cu si un famia di un polis tin Coronavirus y e polis ta vacuna, cu e no mester bay den cuarentena. Pues cu aunke bo casa ta isola y malo na cas, cu e polis por sigui traha normal. E sindicato ta considera e decision aki di gobierno como iresponsabel y inaceptabel. E polisnan ta convenci cu den casonan asina, e polis mester keda den cuarentena na cas toch pa evita cu e virus ta sigui plama den Cuerpo Policial, cu chens pa contagia polisnan y nan famia inocente na cas.
E sindicato a informa Minister Presidente cu ultimo tempo Cuerpo Policial ta manehando un problema serio internamente relaciona cu contagio di Coronavirus bou di e polisnan. Ya caba, sin influencia di e pandemia, Cuerpo Poilicial ta opera cu un scarsedad di personal. Awor, door di e pandemia y contagio, e problema ta bira asina grandi cu hopi biaha no por ehecuta trabounan diario y regular, pa falta di personal cu ta malo na cas.
Como consecuencia di esaki, polisnan ta haya nan ta traha overtime y mayoria bes hasta dos warda pa dia, esta 16 ora sigui, pa dianan largo, pa por mantene e cuerpo operacional. Esaki cu tur reto cu e ta trece cu ne financieramente pa gobierno pero tambe pa e bida priva di e polis en cuestion.
Papiando di esaki, e sindicato di polis a trece na conocemento di Minister Presidente cu ta nan percepcion, cu gobierno ta tuma decisionnan drastico den Cuerpo Policial sin participacion di e sindicato. A subraya e hecho cu por traha hunto y yega na decisionnan na interes nacional hunto, solamente si tin transparencia y comunicacion eficiente entre e partnernan.
Di otro banda, e directiva di sindicato di polis kier sa di Min Pres Evelyn Wever-Croes, kico ta e esfuersonan cu ta haciendo pa baha gasto den cuadro di e landspakket. SPA kier preveni cu ta tuma medidanan unilateral sin consulta cu nan prome. E maneho ey ta demotiva polisnan lo stroba nan funcionamento y cooperacion ora cu mas mester di nan.
Sindicato di polis a desaproba maneho di gobierno pa cu otorgamento di no un, sino dos golden handshake na directornan di WEB Aruba N.V. memey di pandemia, siendo cu nan mes a tuma nan retiro boluntariamente. E sindicato no por compronde con ta exigi di empleadonan publico pa haci sacrificio, entrega parti di salario y beneficionan anto di otro banda ta haci excepcion pa algun categoria, manera por ehempel minister y parlamentarionan cu a baha awo y cu ta cobra overbruggingstoelage, sin entrega nada. Es mas, polisnan a tende cu algun compania estatal ta pagando salario y beneficionan normal, sin haci ningun recorte, ni den salario ni den beneficio, manera bonusnan.
Loading…
Reload document 
Open in new tab Na final SPA a haci un apelacion dramatico na gobierno pa otorga nan un reunion mas pronto posibel, pa por delibera cu gobierno riba e puntonan di importancia aki pa funcionamento di Cuerpo Policial Aruba.
