Irma Gordon, comisario di polis tambe tabata na warda di Playa. E ta responsabel pa loke ta e departamentonan di straatdienst, polisnan uniforma. El a bisa cu warda su portanan ta habri 24 ora pa dia y awor cu lo tin cosnan eyden cu ta malo pa salud di polisnan, lo no ta bon laga nan eyden. Pa e motibo ey nan a sali afo.
Awor aki leiding di polis tin atencion pa e situacion y a sinta cu sindicato tambe. Gordon a splica cu diahuebs e polisnan no a strike, djis e holo tabata mucho sterki pa nan. Gordon y Alto Comisario a presenta na e warda tambe pa nan mes evalua e situacion.
Nan a constata cu berdad e holo ta algo cu e polisnan no por wanta mas.. E holo por haci e garganta tiki fastioso. Por a tende cu algun di e polisnan tabata grawata. Miho cos cu por a haci ta saca nan y bay otro districtonan.
Garantia di polis na Playa
Straatdienst ta sigui traha, djis nan salida no ta na Playa, sino na Noord y Santa Cruz. Nan ta kede pendiente, segun Comisario Gordon. No ta bay tin ningun hende na warda. Ni pueblo mes no por laga drenta warda, pasobra e holo tin cu sali. Ta bay pone un papel na porta, cu si nan tin cu haci declaracion, denuncia, nan tin cu bay Noord of Santa Cruz, te proximo aviso.
Ta spera cu pa e fin di siman aki tur cos ta cla.
