Polis Indio purbando pa recupera e curpa di John Allen Chau, e homber Mericano mata mientras cu e tabata purba di bisa un tribu remoto cu “Hesus stima boso”, a retira nan boto durante fin di siman cu e miedo cu nan lo wordo ataca.
Diasabra, un boto di polis mas of menos 437 yarda leu for di e isla prohibi na North Sentinel, a bolbe bek, despues cu nan a mira nativonan riba e beach arma cu flecha y arco, di acuerdo cu Agence France-Presse.
“Nan a keda mira nos y nos a wak nan,” hefe di polis regional, Dependra Pathak a conta AFP.
Oficialnan ta kere cu nan tin un idea general di unda e curpa di Chau a wordo dera, debi na e informacion haya di piscadonan cu a hiba e hoben di 27 aña cerca di e isla riba 17 di November. E piscadonan, kende Chau a paga 325 dollar pa hib’e cerca di e isla, a bisa cu nan a mira e nativonan lastra e curpa di Chau riba e beach y a dera su restonan.
Shete hende a wordo acusa di a yuda Chau yega na e isla, a wordo aresta.
Regulacionnan gubernamental Indio, ta prohibi interaccion cu e Sentinelnan, kendenan ta conoci pa tira flecha riba intrusonan. PC Joshi, un profesor atropologo na Delhi University, kende a studia e islanan, a bisa cu e tribu isola tin poco resistencia na malesa y por muri si nan drenta den contacto cu stranhero.
Chau tabata un graduado di Oral Robert University, un universidad Cristian na Oklahoma. Den su diario cu el a laga atras, el a bisa cu e ta sinti su mes yama pa “declara Hesus na e hendenan aki.”
Na 2006, e curpa di dos piscado mata pa e nativonan aki a wordo dera y despues di algun dia nan a exhum’e y a reposiciona nan. Autoridad aparentemente nunca a recupera e curpanan aki y tin un miedo cu e restonan di Chau nunca por wordo treci bek.
Famia di Chau a bisa den un declaracion cu nan ta pordona esnan cu ta responsabel pa su morto.
