Polis acusa di menasa cu arma den libertad condicional

Diamars dia 7 di mei ultimo a sosode un caso di hincamento y menasa cu arma di candela den Caya Walishali patras di EPB Hato. A resulta cu un pareha hoben a haya problema cu otro, cu a conduci den violencia y caba den hincamento. Den e proceso, e homber, un agente di Polis, a saca su arma di candela reglamentario pa defende su mes. Consecuentemente Fiscal a dicidi pa cera tur dos, un pa hincamento y e otro pa menasa cu arma. Ambos ta den libertad awor, pero e Polis tin un lista di condicion mara na su libertad.

Abogado mr. Chris Lejuez ta defende e Polis mientras cu abogado mr. Carolina Hart ta defende e mucha muhe, den e caso aki. E abogadonan awor ta analisando e declaracionnan di ambos sospechoso duna na Polis, pa por determina nan defensa. Den e caso aki, ambos persona ta un sospechoso di husticia. E reto den ta cu nan tin un baby, cu dado momento a keda sin su mama y sin su tata, ora ambos tabata cera den cel na Warda di Polis.

Lindsay Kelly, e mucha muhe, a sali liber prome yegando su 10 dianan di detencion na Warda di Polis. Ministerio Publico ta acus’e di maltrato cu arma y intento di asesinato contra su mesun pareha. E homber, un Polis hoben, Sidney Tromp, ta confrontando un acusacion serio di menasa cu arma di candela.

Fiscal a laga e Polis liber bou un lista di condicion, manera cu e no mag yega cerca di su pareha. E mester keda na disposicion di Reclassering y e no por haya su mes den ningun sorto di problema cu husticia, sino ta cer’e bek. Mientastanto a dun’e prohibicion pa drenta tur Warda di Polis y a kita su arma di candela for di dje, durante e investigacion penal andando. Claro cu den caso asina, e investigacion penal y esun disciplinario ta cana paralelo.

Di e forma aki, un relacion toxico, yena cu jaloezie, ta conduci na dos persona hoben den comunidad awor cu un futuro marca pa un hecho criminal, cu ta bou investigacion y cu por causa un problema pa nan futuro carera. E mucha muhe a aplica y ta canando e caminda pa bira juffrouw di scol, mientras cu e homber apenas tin algun aña den Cuerpo Policial Aruba.