Diabierna anochi alrededor di 9:30 pm polis a presenta cu urgencia den Calabasstraat na Dakota p’un situacion sospechoso. E habitantenan di e area a bati alarma p’un homber cara tapa dilanti nan cas. A mir’e ta haci diferente movecion straño.
El a coba den un ‘toolbox’ y saca un obheto skerpi. Den un paña color preto e tabata scond’e. Na yegada di polis, berdad a topa cu un hende homber c’un paña preto den man y den dje un obheto scondi. Na prome instante, e polisnan no tabata sa kico e tin scondi. A pensa cu ta un arma di candela. Pa cual a tuma tur medida di necesario.
E homber no a ria y na mas cu un ocasion tabata cana bay riba e polisnan. No ta descarta cu e polisnan por a tir’e, mirando cu mayoria polis na sitio ya a saca pistol den man y tabata cla pa tira. Despues cu a logra convenc’e bay suela, a bay over mesora n’e proceso di detencion. E detencion no a bay facil, mirando cu el a resisti formalmente.
E tabata insulta e polisnan y menasa tur cu e lo mata nan. Den un transporte policial a bay cu ne warda di polis caminda lo present’e dilanti un subfiscal. E sospechoso lo keda basta dia tras di tralie. Si tur e polisnan entrega un keho pa menasa di morto, e ta hay’e ta keda paden pa basta rato.
