Diasabra anochi Polisnan di Oranjestad a tene un accion di control preventivo den trafico te cu awe diadomingo mainta. Un cantidad grandi di Polis y diferente departamento di Polis y husticia a participa, pa na final garantisa mas siguridad den trafico riba nos isla.
Cuerpo Policial Aruba a informa awe cu na tur a controla 166 vehiculo y a parti un total di 44 multa, a haci 3 detencion, di cual 1 tabata posecion di droga y 2 pa stuur auto sin rijbewijs.
Polisnan a controla tambe riba permiso di estadia y trabou di stranheronan permaneciendo riba nos isla. Gobierno a anuncia cu tin mas cu 10 mil ilegal bibando y trahando scondi na Aruba pa cual e instancianan concerni ta controlando den forma feros e ultimo simannan aki. Den maneho di Minister Andin Bikker, encarga cu husticia, siguridad y migracion, a start un maneho mas stingente y a percura pa mas personal y ekipo pa Warda nos Costa y a duna Polis e autoridad atrobe pa sigui controla stranheronan pa nan permiso di estadia of di trabou.
Durante e controlnan aki, a detene no menos di 7 persona cu no por a mustra un permiso valido na e momento ey. A pasa nan pa e departamento di Warda nos Costa pa mas investigacion y verificacion cu e sistema automatisa awor di DIMAS.
Cuerpo Policial Aruba a sigura di lo keda efectua mas di e tipo di controlnan aki den e dianan binidero.
