Ruzben del Valle Gomez Carrasquero, Jose Antonio Silva Castro y Diego Fernando Giraldo Rios, tur tabata riba e boto cu a drenta awanan territorial di Aruba dia 9 di juli 2018 cu intencion pa baha un grupo di supuesto 6 ilegal na costa di Aruba. Ruzben tabata Capitan di e boto, na kende e pasaheronan a paga 300 dollar pa trata di yega Aruba, mientras cu Jose Antonio tabata su ayudante y Diego tabata un cliente, pero cu a haci fabor na un persona pa trece un saco di paña.
Pero no tabata trata di cualkier saco di paña. Ta trata di pañanan cu a wordo baña den cocaína cu a wordo haci likido. Ora cu expertonan a haci un calculacion di loke por tabatin na droga, esaki a resulta un poco mas cu 2 kilo. Segun Rios, niun momento e tabata sa cu tabata trata di droga. Un homber cu e conoce como Umberto a pidi’e haci’e e fabor di hiba paña pa un grupo cu a “biaha” un dia prome pa Aruba abordo di un boto clandestino.
Supuestamente na costa lo tin un auto blanco ta sper’e. E mester a entrega e pañanan na e homber y e mesun persona aki lo dun’e un lift na unda e mester bay. Pa e fabor aki Umberto a caba di cera pago di su “biahe” pa Aruba, unda e lo trata di haya trabou pa cria su famia.
E Capitan mes no a papia mucho durante tratamento di e caso no a bisa mucho cos. El a bisa cu e no tabata na altura di e pañanan baña den cocaina, pero tin declaracion cu ta bisa cu el a pidi su ayudante pa tira bista riba e saco di paña cu Rios tabatin cun’e.
Fiscal a mustra principalmente e Capitan cu loke el a haci tabata sumamente peligroso, hincando bida di seis persona den peliger. El a nabega un boto cu no tabatin ningun sistema di comunicacion pa trece e hendenan den forma ilegal na Aruba. Si e motor daña no lo tabatin ningun forma pa pidi ayudo y nan lo a keda drief sin sa si nan lo haya ayudo.
Pa e motibo aki el a pidi 2 aña di prizon pa e Capitan Ruzben y su ayudante Jose Antonio y pa Rios kende tabatin e droga, aunke e ta bisa cu e no tabata sa di dje, Fiscal a pidi 12 luna.
Hues no tabatin mester di tempo pa pensa y a dicta sentencia mesora, manteniendo su mes na loke ta e norma di Corte Superior. A keda proba e acusacion di contrabanda di hende, “cu ta algo sumamente peligroso cu por costa bida di hende”, e Hues a bisa. Pa e importacion di droga nan a wordo declara liber. Pa e Capitan y e ayudante el a impone un castigo di 18 luna incondicional y pa Rios cu tabatin e droga y cu su storia pa Hues no ta algo cu e por kere, el a impone un castigo di 24 luna, di cual 12 luna ta condicional y 2 aña di prueba. O sea e tin cu sinta 18 luna.
E castigo ta nifica cu probablemente nan lo sinta 12 luna (2/3 parti) y pa bon comportacion lo sali (deporta) e ora ey. Pero tambe Minister di Husticia por dicidi cu e ta laga nan liber prome y ta deporta nan for di Aruba mara na un periodo cu nan no por drenta mas.
