Diadomingo mainta Polis a gara un ladron u rato despues cu el a horta un trahado na altura di e Vlooienmarkt dilanti CITGO Bouelvard. Un señora cu ta bende na e Vlooienmark ta e victima. E tabata atendiendo un cliente ora e hoben aki a pasa man pa su tas cu benta di dos dia y huy riba bicicleta. E señora desespera a cuminsa core pa mira si ta yega e ladron riba bicicleta, pero no a logra, pa cual a yama Polis mesora.
E pober señora den su desesperacion a acerca algun hende eybanda puntrando si nan a mira un guy jong riba bicicleta. Un otro comerciante eybanda a mira e señora buscando yudansa y a sali yuda mesora. El a subi den nan auto y a cuminsa core rond buscando e ladron.
A bin topa cune den Eagle banda di e Tennis Court y ey a bloki’e cu auto. E tabata core manera nada a pasa cu e tas ainda cu el a caba di horta. E pareha comerciante a baha mesora y asina bay riba e ladron cu mas bien a spanta cu un accion asina. E no a spera nan. A wante abou na tera y a solicita presencia urgente di Polis.
E señora den su rabia hasta a dal e hoben ladron dos skop. A purba evita tog cu e ta haya daño. Polis a yega y nan a detene e ladron wanta na suela. E señora a haya su tas y full e placa tabata den dje intacto. E placa tabata na dollars pasobra e ta bende cu turista na Vlooienmarkt.
E señora a keda hopi contento cu e yudansa cu el a haya di e pareha comerciante cu a mir’e coriendo desespera tras di e ladron. Polisnan a bisa di conce e hoben aki pasobra e tabata envolvi caba den otro caso di ladronicia, pero e tin suerte cu constantemente Fiscal ta lag’e liber mesora. Polis a transport’e cu bicicleta cu tur pa Warda di Polis pa mira si e biaha aki si ta logra want’e encarcela pa su acto.
