Kisas no ta muchu bon kla pa outomobilistanan ku na momentu ku bo ta kore outo, e ko- okupantenan tambe mester tin nan faha di seguridat bistí. Aparte di e personanan ku ta sinta dilanti den un vehíkulo, pues e shofùr i ko-okupante, un menor di edat mas largu ku 1.50 meter ku ta sintá patras tambe mester tin su faha di seguridat bistí. Na momentu ku polis tene un kontrol di tráfiko i konstatá ku tin menor di edat sintá patras sin faha di seguridat bistí, e persona aki tambe ta haña un prosèsverbal. Pa menornan di edat bou di 12 aña ku falta ku regla di faha di seguridat, e prosèsverbal ta bini riba nòmber di e shofùr. Adultonan ku ta sinta patras den un vehíkulo, tambe mester bisti faha di seguridat, te asina leu ku patras den e vehíkulo tin faha di seguridat. Tene na kuenta ku den kaso ku un vehíkulo ta disponé di faha di seguridat tantu dilanti komo patras, e vehíkulo aki no mag karga mas tantu persona, ku tin faha di seguridat pa nan. Komo ehèmpel, si pa e asiento patras di e outo tin tres faha di seguridat, hamas i nunka por tin kuater hende sintá patras den e vehíkulo aki. Uso di faha di seguridat tantu dilanti komo patras ta kontribuí na evitá ku durante di un aksidente un persona por risibí leshonnan ku por a lag’e keda desabilitá òf te asta pèrdè su bida. Pronto kontrolnan dirigí riba bistimentu di faha di seguridat patras ta bai kuminsá.
