Dia 29 di april ultimo a tuma luga un accidente riba lama na Barcadera, caminda cu un famia di ocho persona cu tabata den boto ‘Chloe’, tabata crusando e canal ora cu diripiente e boto ‘Palo Biew’ a bin dal den nan.
Despues di e impacto ‘Chloe’ a cuminsa sink te yega fondo. Palo Biew tambe a sufri daño durante e accidente aki. Tabatin varios persona herida den e accidente aki.
E famia cu tabata riba e boto Chloe no a keda contento cu e situacion. Nan a sinti cu e capitan di Palo Biew tabata bebi.
Pero e capitan di ‘Palo Biew’, Mario Rasmijn, a bin dilanti y a desmenti tur esaki. El a conta cu si mira e accidente cu a indica cu t’e a caus’e, no ta berdad.
El a splica cu por a mira practicamente e boto Chloe a dal den su boto. Por a mira un buraco grandi caminda cu e boto a dal den banda di Palo Bieu. Si ta Rasmijn a causa e accidente, su boto lo a dal parti dilanti di e otro boto. Kiermen cu e boto contrario cu a sink, a bin dal den su boto.
NO TABATA BURACHI
Mario Rasmijn a conta cu den ningun momento e tabata bebi. El a bay boluntariamente haci un test y e test a sali cu e no a surpasa e limite di alcohol. El a haya tur su pertenencianan bek. Wardacosta mes a entreg’e yabi di su boto y despues di esey polis mes a hib’e cas, unda cu a lag’e sa cu e por bay busca su vehiculo.
RIBA LAMA
Mario tabata bayendo pa busca un conoci pa bay pisca den lagun, pero a resulta cu nan a cambia di idea y a bay otro caminda. E ora Mario a dicidi pa bay bek pariba di e waf di Barcadera unda e sa mara su boto, unda cu consecuentemente a hay’e envolvi cu e boto ya menciona, unda cu esaki a purba di crusa su dilanti y a dal den su banda.
Segun conteo di Mario, e boto contrario tabata hopi carga y sin salbabida. Ta algo cu e ta lamenta hopi cu e otro capitan a purba di crusa su dilanti, cu un boto mas grandi cu ne. Mario ta sorprendi cu nan a declara cos cu no ta berdad.
COS POR A BAY OTRO
Mario a bin cu su boto un banda di motor so gestart y no duro. E ta kere cu e otro capitan lo a purba di ‘take chance’ y no a logra. Esey a causa e accidente.
PALABRA FINAL
Mario a bisa por ultimo cu e ta pidi e famia disculpa di loke a pasa. Si el a mira luz na tempo e lo a baha su velocidad y si nan a mir’e na tempo, nan tambe por a slow down. E ta lamenta cu cos a bay asina aki. P’e otro piscadonan, ora cu subi lama “wak pa bo tin tur bo papelnan, tur cos na ordo, manera ley maritimo ta exigi.”
