Flohera ta pica, pasobra e stroba hende di obedece Dios. Tambe di haci locual ta duna e gloria na Dios, pasobra hende floho ta constantemente den desobedencia y lo sufri perdida (Mateo 7:24-28).
Un hende floho no ta crece, pasobra e mes no kier progresa, pero e kier biba un bida facil y tin biaha riba custia di otro hende. E ta papia hopi cu su boca, pero su curpa ta haci dolor pa move.
Floho cuanto tempo mas bo kier keda drumi? Ki ora bo tin idea di lanta for di bo soño?
Laga mi drumi un poco mas, cabisha poco mas cu man crusa, asina bo pobresa lo bin manera un bagamundo, y bo necesidad manera un homber arma (Proverbionan 6:9+10+11).
Tin tres tipo di flohera:
Flohera fisico: cual ta esun cu no ta gusta traha y kier drumi y come henter dia.
Flohera Mental: ta esun cu kier tur cos facil, no ta gusta nada di responsabilidad, no ta gusta nada den cual e tin di husa su mente. E tin un mente infantil y tambe kier bira rico sin traha. Hopi biaha esaki ta hiba hende na bida inmoral, benta di droga, atraco etc.
Flohera spiritual: ta esun cu no ta bishita Iglesia, tampoco haci oracion, tampoco ayuna y no ta lesa su bijbel. Esaki ta nifica cu su bida spiritual no tin ningun clase di defensa.
Hopi biaha bo ta haya hende no ta tuma un trabao serio pa motibo di flohera, semper nan ta busca part time, pa nan haya tempo liber y tempo pa drumi.
Esun cu traha cu man negligente ta bira pober, ma man di e balente ta haci rico (Proverbionan 10:4).
Man di hende balente lo goberna, ma negligencia ta hiba na trabao forsa (Proverbionan 12:24).
Alma di hende floho ta antoha y no ta haya nada, ma alma di hende balente ta keda satisfecho (Proverbionan 13:4).
Den tur trabao tin ganashi, mas djis papia cu boca so ta conduci na probesa (Proverbionan 14:23).
Nos ta bibando den tempo cu tur cos ta digitalisa, pero nos ta notando cu tin hende cu no kier traha y cu ta pensa cu tur cos ta facil. Nos tur sa cu di berdad esey no ta asina, pasobra ta deseo di Dios pa tur hende traha (2 Thesalonisensenan 3:10).
Hopi hende kier tin un negoshi grandi, pero ta bon ora bo cuminsa bo negoshi, pa bo mes haci e trabaonan prome cu bo expande, pasobra despues bo por duna ehempel, pasobra bo sa kico e trabao ta come y bebe.
Den Mateo capitulo 25:26-30 Señor ta mustra bon cla kico ta pasa cu hende floho. Hasta locual cu nan tin ta kita for di nan y duna na esunnan cu ta gusta traha.
Como mayor nos mester instrui nos yiunan den trabao di cas, pasobra esey ta parti di e disciplina pa crecemento. Tambe e ta conta como formacion di caracter. Pasobra bienaventura ta e hoben cu por haci tur trabao di cas, laba, strika, cushina etc., pasobra ora e beneficio lo ta hopi grandi pe ora e mester bay studia den exterior. Y ora e casa e por yuda su esposa den tur trabao di cas.
P’esey mi rumannan stima, sea firme, constante den boso trabao pa Señor sabiendo cu boso trabao no ta envano den Señor (1 Corintionan 15:58).
Flohedad ta pone hende cay den un soño profundo y un hende cu ta sinta pornada lo sufri hamber (Proverbionan 19:15).
No stima soño pa bo no bira pober, habri bo wowo y lo bo tin pan na abundancia (Proverbionan 20:13).
