Na 2009 Corte di Prome Instancia a declara e pastoor Doodle Sophia liber di acusacion di inmoralidad cometi cu un menor di edad. Ministerio Publico a apela pasobra no a keda contento. Awo nan a haya rason. Hof a haya e pastoor culpabel.
E prome sentencia a cay dia 16 di juni, 2019. Tabata trata di un caso cu a tuma luga na aña 2016. E acusacion tabata cu na aña 2016 e lo a drenta un camber unda un mucha muhe di 10 aña tabata sinta ta wak TV. Segun declaracion di e mucha na su mama, e pastoor a mishi cu su pecho y despues a pidie habri su carson pero el a nenga. Tambe e mucha a declara cu pastoor Sophia tabata yam’e su casa chikito. Pero e Pastoor ta bisa cu nada di esaki ta berdad.E mucha e tempo ey tabatin 10 aña.
Tur esaki a tuma luga na e Trai Merdia di e Iglesia di Sophia. Hof a yega na e conclusion cu e denuncia ta suficientemente sosteni (steun bewijs) pa e emocionnan cu e testigonan a nota den e menor y e cambionan constata den dje. Polis tambe a mustra tur e indicacionnan cu ta trata di un mucha molestia. Tur e hecho aki lo a sosode dia 9 di november, 2016. A base di e ariba menciona, Hof a conclui cu e pastoor ta culpabel y a haya un castigo den forma di 80 ora di trabou pa comunidad of 40 dia cera.
Den prome instancia a declar’e liber pasobra Corte a considera cu no tabatin “steun bewijs” y cu tur declaracion ta bini for di un banda so, di e menor. Pues e mama y tata sa di loke e mucha a conta nan.
Si un di e partidonan no ta contento cu e decision aki, nan por bay Casacion (Hulanda).
