Fin di siman a cera cu algun accidente den Playa. Practicamente tur tabata hende bou influencia di alcohol y/of otro substancia. Den e caso aki tabata trata di un chauffeur cu a pasa ranca un borchi di trafico patras di edificio di Corte.
Esaki a tuma luga den careda di 1:00am (marduga) ora cu polis a presenta y topa cu e borchi tira abou y e chauffeur cu intencion di bandona e sitio. E no por a yega mucho leu den e estado cu e tabata.
Polis a mobilisa lihe y a bin topa cu ne na un distancia den e area. A deten’e mesora y pidi transporte di polis pa asina hib’e deteni.
Alcoholic Anonymous Aruba:
E reto no ta cu bo tin problema di alcohol of droga, sino cu tin ayudo, Mescos cu bo, tin hopi otro ciudadano cu tabatin of tin e mesun problema cu bo y cu ta dispuesto pa comparti cu bo nan storia di exito, cu awe nan ta liber di alcohol of droga. Ta un grupo cu ta topa diariamente na diferente sitio, pa esun sostene e otro y hunto laga e bicio, cu ta caba cu bo famia, bo carera laboral y sin lubida bo salud.
Alcoholic Anonymous Aruba ta existi pa hopi aña caba y tin reunionnan diario, tanto na nan clubhuis na Sabana Liber na Noord of na Weg Seroe Preto na San Nicolas. Pa mas informacion di orario di reunion of pa por bel y papia cu un boluntario, subi e website: www.aa-aruba.org.
“Hende no ta cambia pasobra nan a mira e luz. Nan ta cambia pasobra nan a sinti e cayente”
