Un proposicion innovativo pa e debe di Aruba cu Hulanda a keda presenta awe den het Torentje na momento cu e lider di oposicion mr. Mike Eman y Prome Minister Mark Rutte a sostene un reunion.
“Den prome instante nos a topa otro como amigo cu a conoce otro hopi aña y na mes momento a sostene reunion riba e temanan importante cu e ex-prome minister Mike Eman a presenta”, tabata e prome palabranan di Prome Minister Rutte ora e a sali hunto cu lider di oposicion, mr. Mike Eman pa duna un relato na prensa di e reunion cu nan a caba di sostene den het Torentje.
Prome Minister Rutte a menciona dos tema importante cu Eman a presenta, esta e necesidad pa conecta e desaroyo economico na e desaroyo social. Rutte a agrega na esaki cu Hulanda tambe ta den buskeda di conceptonan pa conecta e economia mas na e aspectonan social y ta compronde e deseo di Eman.
Tambe e Prome Minister di Hulanda a mustra riba otro punto hopi importante cu a keda presenta pa Eman, esta con ta bay atende cu e tema di cu debe cu Aruba tin cu Hulanda. A pesar cu Gabinete Rutte ta demisionario Eman ta considera importante pa e proposicion cu e a haci cuminsa cana e caminda cu un gobierno demisionario ta haya apropia, pendiente di un gobierno nobo.
Youtube video link: https://youtu.be/Pr5oM2Mx31c
Modelo Cabo Verde-Portugal Investment Fund
E modelo di solucion cu Eman a propone na Rutte ta inspira pa e areglo cu Portugal y Cabo Verde a acorda algun luna atras. Cabo Verde mescos cu Aruba a fia placa di Portugal durante e periodo di COVID. En bes di cobra e placa bek of exonera e debe a cana un caminda intermedio cu ta responsabel y na e mes momento na beneficio di e desaroyo duradero di Cabo Verde. E solucion di Cabo Verde-Portugal ta cu e pagonan di Cabo Verde lo bay den un Fondo pa inverti den un desaroyo sostenibel pa Cabo Verde.
Eman ta splica cu prome cu a bin Hulanda, a reuni cu Aruba Investment Bank caminda e fraccion di AVP a presenta un nota cu un solucion similar. A consulta cu AIB riba nan pensamento di un Investment Fund ya cu nan a maneha cu exito e Fondo di Inversion FDA, cu tabata un acuerdo di Aruba y Hulanda di tempo di Gabinete Henny Eman III. Na final di e periodo di FDA e propio Hulanda a haci un estudio di con e fondo tamaneha y a yega na conclusion hopi positivo.
Solucion alternativa y decision na e discrecion di un gobierno nobo
Den e reunion cu Rutte e nota aki di fraccion di AVP tabata presenta pa Eman y cu un splicacion cu un acuerdo asina lo ta hopi positivo pa ambos pais, pasobra inversion ta keda un necesidad grandi pa Aruba. Un fondo financia for di propio pago di Aruba cu lo mester a bay Hulanda lo ta deposita den un fondo maneha pa Aruba y Hulanda, cu lo ta destina pa desaroyo di Aruba.
E temanan cu lo ta financia for di un fondo di inversion asina pa Aruba lo keda acorda tambe entre e paisnan. Eman a menciona entre otro enseñanza, desaroyo social, innovacion, desaroyo duradero y renobacion di bario, y infrastructura. Pero esakinan ta e temanan pa keda analisa ainda, pero den todo caso si por yega na un palabracion asina cu Hulanda e pagonan di Aruba pa e debe cu Hulanda di e forma aki lo keda pa inverti na Aruba.
