Probechando bishita di e delegacion di Parlamento di Aruba na Boneiro, cu a bay pa atende reunionnan Interparlamentatio entre Hulanda, St. Maarten, Corsou y Aruba, cu a opta awe pa atende e despedida di e politico Johan Evert “Jopie” Abraham. E ex-lider di Partido Demokratiko Boneriano (PDB) a fayece cu 72 aña di edad. Un delegacion di e fraccionnan di MEP, AVP, RAIZ, Accion 21 y MAS a atende e despedida awe.
Mester menciona cu un cantidad di Boneriano a bay despedi di nan lider y politico cu tanto a traha pa e isla di Boneiro. Eynan a tende hopi storia y aunke tur tabata basa riba otro scenario y situacionnan, den tur e storianan ta central e amor di e politico pa bienestar y progreso di Boneiro. Y den esey, e lasonan cu Aruba semper tabata bon.
Durante e storianan cu a resalta awe, tin entro otro e relacion masha estrecho entre Jopie Abraham y defunto Betico Croes di partido MEP di Aruba. Nan tabata asina pega cu otro, manera un ex-dipitado di PDB a conta awe, cu un biaha cu Boneiro no tabatin placa pa paga salario di empleadonan publico, cu Betico Croes a percura pa “schiet voor” un suma substancial di Aruba pa e ambtenaarnan di Boneiro por a cobra sin problema.
E ceremonia special di awe a cuminsa for di 11:00 am ora cu a sali for di funeraria Nos Consuelo, a bay cas di Jopie Abraham, a pasa Zeezicht Restaurant, a pasa bestuurskantoor di Boneiro, conoci como “Passangrahn” y regresa funeraria pa un tempo priva pa famia por despedi. Merdia 1:00 pm a habri atrobe pa publico por a pasa despedi. Atardi e ceremonia a termina cu Peter Silberie cantando e cancion preferi di e politico, esta “My Way”. Cu Jopie sosega na paz.
