Sr. Paul Croes ta bon amigo di parlamentario di AVP, Mike de Meza y su ex-colega. E ta manda bis’e hopi forsa, Dios ta grandi y Dios ta amor. E lo sa di guia e proceso aki y su persona tambe den e direccion corecto.
Ta un lastima pa mira loke a tuma luga. De Meza mes tin duda con e investigacion aki a tuma luga. E manera cu el a tuma luga.
Hendenan cu mente diabolico a bay entrega keho, traha storia y e ta sumamente decepciona e direccion con Ministerio Publico a tuma den e caso aki.
Parlamentario de Meza a menciona cu su sosten tey sigur sigur.
E ta sigui comenta cu tur politico na Aruba, pa bay cu un campaña politico, ta busca donacion, ta organisa lectura, tene BBQ, ta organisa presentacionnan di motivacion y tur ta bende ticket pa nan por haya entrada pa nan por core un campaña politico.
Aki na Aruba ta tur politico ta haci esaki. No laga ningun politico gañabo cu e no ta haci’e. Tin politico cu gran parti ta sak’e for di nan mesun saco y toch ta bay haci fundraising.
Si ta un fundraising bo haci y cu bo a haya entradanan pa bo core un campaña politico y ta wordo encarcela of condena pa esaki, e ora, segun e parlamentario, casi 99% di tur e politiconan na Aruba, mester wordo encarcela.
Ta un practica normal cu tin na Aruba cu bo ta haci bo fundraisingnan pa bo haya entrada pa bo por core un campaña politico.
Aruba no conoce ley riba financiamento cu ta den efecto, caminda gobierno por ehempel, ta yuda partidonan politico financieramente, pa nan core un campaña, manera cu tin na algun otro pais.
Aruba no tin esaki. E partido politico, di un manera of otro, tin cu bay e ora ey haci su fundraising, pa e por haya entrada, pa e por core un campaña politico. E ta costabo placa. Tin cu move rond, tin cu bay combersa cu hende, mester tene reunionnan.
Ta normal y un tradicion na Aruba cu partidonan politico tin cu t-shirt, cumpra pechi, ta haci nan propaganda, ta bay den corant, ta bay na radio. Tur esey ta costa placa.
De Meza mes, tempo cu e no tabata den politica, tabata cumpra bukinan di BBQ di tur partido politico na Aruba. Tempo cu el a drenta, asina mes, bo ta yuda hende cu ta den un otro partido politico, cu bo ta cumpra un of mas ticket di nan, nan tambe ta cumpra dibo. Ta algo normal cu tin na Aruba.
E ta bira sumamente peligroso na momento si bo tene fundraising pa haya entrada, pa bo core campaña politico, bo wordo condena of encarcela.
